家居裝修紀錄(2)-「真.首期」俾幾多?


石先生上回(睇樓與揀樓)咪講自己計好數先買樓,但其實真係買嘅時候就發覺計漏左唔少錢。石先生買嘅係市區舊樓,樓價 500 萬,做八成按揭,拿兩成首期,即係 100 萬。

不過政府規矩多,首期俾 100 萬呢個預計實在係太粗略啦!因為要俾嘅錢其實仲有好多同埋分開好多唔同時間,唔計準確啲,首期計得太盡就會唔夠錢俾。

以石先生首次置業,500 萬樓,八成按揭嘅情況來計,以下同大家拆返啲細數出來,就會明白「真.首期」唔止 100 萬。


  • 首期細訂(3%)= HK$150,000
  • 印花稅(3%)= HK$150,000
  • 首期大訂(7%)= HK$350,000
  • 查冊等各項雜費 = HK$1,000
  • 律師費 = HK$6,000
  • 地產佣金(1%)= HK$50,000
  • 餘下首期(10%)= HK$500,000

「真.首期」總計 HK$1,207,000,比本身以樓價計首期嘅 20%,再多 4.14%,足足仲差 HK$200,000,所以首期真係唔好計咁盡。因為由你簽收左楝樓個日開始,其實你已經要俾管理費、差餉、水電等等雜費。即使你未入去住,只係養昆蟲,都一樣要俾。

計完「真.首期」,當然仲有「真.供樓」啦!搞得掂壓力測試,搵埋銀行做按揭,估足價(估唔足價嘅話,請你自己再補差價落「真.首期」個度)。

HK$5,000,000 嘅樓,根據政府嘅政策只能做 6 成按揭,所以想做 8 成按揭,就要買按揭保險(詳情自己睇)。按揭保險嘅錢及手續費係供樓入面計埋嘅,所以係「真.首期」入面就唔駛俾,但後面就有排你俾啦!


  • 首期 = HK$1,000,000
  • 餘款 = HK$4,000,000
  • 按揭保險(時利率 2.15%) = HK$86,000
  • 實借 = HK$4,086,000
  • 分 25 年供款(假設 H 按 1.75%),每期(月) = HK$16,801

睇得明未?將「真.首期」再加「真.供樓」,買一楝 500 萬嘅樓,唔計管理費水電煤裝修傢俬電器,其實係以下呢條數:

  • 「真.供樓」總貸款連利息:HK$5,040,298
  • 「真.首期」總首期連雜費:HK$1,207,000
  • 總計 HK$6,247,298

所以若你有父幹或母幹,可以一次過俾哂,你就可以慳成一百萬,約 20%,夠錢俾楝舊樓嘅首期啦!下回【家居裝修紀錄】同大家進入考驗頭腦及精神嘅裝修階段。

家居裝修紀錄
家居裝修紀錄(1)- 睇樓與揀樓
家居裝修紀錄(2)-「真.首期」俾幾多?
家居裝修紀錄(3)- 電制制面價格差一倍,走進內街很重要
家居裝修紀錄(4)- 電制單制定雙制?唔好係咪都雙制







【此文章刊載於石先生部落;標題:家居裝修紀錄(2)-「真.首期」俾幾多?;本篇文章為贊助內容;強制廣告:HisTrend.HK 給你不一樣的科技產品】