曾幾何時，港產片真係幾好睇。
由港產片成日講嘅警匪片，到一啲瘋狂嘅低成本片都好吸引，石先生覺得呢兩樣港產片嘅特質（可能你覺得唔係，唔緊要）開始無了，依家真係唔多容易係港產片上搵到。
先講依家仍然有好多嘅警匪片。唔知係受中國大陸影響，還是受香港地方局限，今時今日嘅警匪片睇完無記憶。石先生過左咁多年記得嘅都係舊舊地嘅片，《黑社會》、《無間道》及《寒戰》，其他再舊嘅純警察片真係要數到九十年代。
無左呢啲港產警匪片，想搵類以嘅題材睇其實唔難，望去韓國，佢地好多呢類型警匪片，或者正確來講係南北韓片。雖然唔係警察對匪徒，但係劇情、動作上嘅設計真係滿足左沒有港產警匪片嘅空白。好似最近睇嘅一套《機密同盟》，雖然講南北韓，但睇落嘅感覺反而好有以往睇港產警匪片嘅感覺。
離開警匪片，有啲瘋狂、無厘頭嘅電影都好似無左。反而中國大陸係現實社會好多奇怪事嘅情況下反而不時會有呢類題材。由好多年前嘅《瘋狂的石頭》開始，到之前嘅《煎餅俠》、《火鍋英雄》或呢套《西虹市首富》都係一啲睇完令人會心微笑嘅瘋狂、無厘頭電影。
如果你平時唔睇大陸劇、唔睇大陸電影嘅話，其實好合理，但以上呢幾套值得大家睇下。
香港失去警匪片與無厘頭電影嘅同時，似乎也唔能夠好似台灣咁，搵到佢地獨有嘅熱血青春風格電影，石先生能夠醒起嘅得番《志明與春嬌》（第一集）呢啲好香港本地嘅電影。即使呢幾年耐唔耐會爆一套出來嘅「熱血」港產片，似乎係個一下「熱血」之後都無以為繼。唔同真係都無啲「貼地」啲嘅電影出來？
作為一個觀眾，講完。如果你未睇以上講嘅幾套電影，推薦你睇睇，輕鬆睇幾有趣的。如果想認真用腦，都係睇番美劇或者 Nolan 個啲，謝謝。
