因航「抄油失敗」愈來愈「縮皮」全香港人似乎都知，而到底點縮皮先會令自己感覺到仲係一間尊貴嘅航空公司呢？好簡單，就係從包裝著手，利用包裝來蒙蔽自己雙眼。
如果你有飛過歐洲內陸機，你應該都會感受到歐洲內陸機個種「慳皮」嘅小食，例如一包花生再搭薯片並俾支水你咁。有時候，航空公司未必會人人都派食物，會由空姐空少拿住一盤小食，每一位乘客去問，睇下邊位有需要就拿，慳皮得來又適合乘客本身需要。
唔知因航係咪擔憂華人天生怕執輸，有得拿實拿到蠱嘅關係，佢地「縮皮」得來又無採用呢種自由選擇方式，同時又為左保留少少自家特色，所以採用以下呢種短途機小食做法。
由香港飛桂林這種是一小時左右的機程，與香港飛台北差不多，但因為飛大陸可以預期係相近距離嘅情況下小食又會差少少。
空姐拿上來的是一包紙袋，而這個紙袋裡裝的不是「永恒雞捲」，而是「不運曲奇」、一條牛奶朱古力及一支 Bonaqua 精裝水（精裝即係打完波一口氣飲得哂都唔夠喉個隻）。
嗱嗱嗱！點解呢塊曲奇會否「不運」呢？下面同大家詳細分享下。首先呢塊曲奇本身係朱古力曲奇，食落去唔算淡而無味，有少少朱古力味，但又好難稱得上好食。如果你上機前無飲夠水，自己又無買水上機，食完呢塊曲奇，應該好快都想飲水嫁啦！
食完曲奇唔夠喉，食埋牛奶朱古力好合理，但問題來啦！牛奶朱古力呢樣野，食落口係幾好味，但食完口腔會有一種油淋淋嘅感覺，唔頂得順嘅又想飲水啦！
因航都好貼心俾水你飲，但支精裝水咁大支，你本身口乾收到飲一啖，食完曲奇飲多兩啖，再食牛奶朱古力後飲多啖，成支水就咁無哂！
如果你第一次食，唔識留前鬥後，或者大大力飲水，咁就真係恭喜你啦！因為係呢個時候除左搵空姐拿多支水，你都無咩方法解決，除非接吻嘅口水可以幫到你。
