家居裝修紀錄（4）- 電制單制定雙制？唔好係咪都雙制

【家居裝修紀錄】雖然寫得慢，但石先生都會完成佢，因為呢啲題目市場上少得來，其實石先生自己都好想寫，一來分享下經驗，二來第時有需要可以再望一次。

裝修嘅，你唔會唔知咩係單制，咩係雙制。如果你連單制同雙制係咩都唔明，咁就無咩好講了！以石先生今次裝修來計，單制一個 $700，雙制就 $1200，聽落做雙制好似抵 $200，但事實上又係咪呢？

答你之前，你先望下屋企啲電制插住啲咩！

無錯啦！屋企入面大部份電制都會連住一個拖板，而無論你用緊嘅係單制定雙制，你都實會連住個拖板，所以本身聽落好抵嘅雙制，其實唔係想像中咁抵，因為你整雙制後無可避免又會連拖板，結果唔係你想像中咁抵。

當然啦！拖板使用上有限制，例如你插冷氣、熱水爐、焗爐呢啲高用電量嘅野就唔可以連拖板，但如果你只係幫手機充電，咁就唔駛要雙制啦！

除左電壓問題唔用得雙制外，如果你屋企個個位真係會放好多唔同電器嘅，你都值得整雙制，一般來緊好似廳嘅牆身位、電視下面嘅電視櫃位、廚房嘅工作平台位都係雙制嘅熱門位置。

至於書房工作枱下面、睡房、梳化旁、電視機後一般都係單制比較多，特登整個雙制都未必有用。

既然係咁，點解整電嘅師傅又會建議做雙制呢？好簡單！依家做電線電制大家都係做暗線，即係先鑽牆打坑出來，放入硬膠管，再將電線收入去。

你做雙制（HK$1200）嘅話，鑽牆打坑都係同一個位，只係電制個位要開大小小，工夫唔會因為做雙制加倍。反之，如果你做兩個唔同位嘅單制（$700），咁每個位都要鑽牆打坑再開電制位，每個制都要做全套服務，你話師傅鐘意你做雙制定單制。

石先生嘅建議係，如果你想唔清楚屋企到底有咩位要放電制，又想做定先，怕第時唔夠用，咁你最好係做兩個同位嘅單制，例如一個單制係牆嘅左邊，另一個單制係牆嘅右邊，都好過一個雙制係牆中間。

原因好簡單，你既然未決定到電制放咩位，即係傢俬都未必決定哂，咁嘅話就梗係唔同位置放定電制以便傢俬來到時仲有位用啦！

睇到呢到，知道幾時要整單制，幾時要整雙制未呢？至於邊到買電制，請睇上一篇：家居裝修紀錄（3）- 電制制面價格差一倍，走進內街很重要