可能因為呢輪流行「#DeleteFacebook」及「Facebook 已死」，所以近幾年成日話寫 Blog 已 OUT，要擁抱 Social Network、拍多啲片上 Facebook、做 LIVE 嘅朋友，又叫大家要開始寫 BLOG，風向真係轉得快過颱風。
既然大家鐘意講寫 BLOG，咁石先生呢啲由 2008 年開始寫 BLOG，持續寫左成 10 年 BLOG，做左 Content 成十年嘅就同大家講下寫 BLOG 點樣寫得快啲。
寫 BLOG 先要敲打鍵盤
寫 BLOG 要寫得快，其實唔係靠字筆去寫，係靠敲打鍵盤輸入思想去電腦，所以敲打速度及方法成為當中嘅關鍵之一。大學嘅時候，唔識打「倉頡「無法畢業曾經引起一眾同學嘅不滿，所以後來爭取至「速成」、「筆劃」甚至「九方」打中文都得，只要打字速度去到一定水平就畢業。
到底用咩輸入法打字快啲呢？有人話係「倉頡」，有人話係「注音」「拼音」，也都有人話「九方」，但經過近十年與各路寫 BLOG 人嘅討論與觀察，最終嘅答案係…
你用得最熟個個打字方法！無錯！每個人都有佢自己用得最熟嘅打字方法，不論係邊種，只要係你最用得最熟個個就一定係最快。打開「倉頡」嘅人去打「九方」，無可避免要經歷一段時間嘅適應，反之奕然。即使新輸入法有幾好，幾易學，「學」呢個階段一定係慢，一定要適應，無可能快。
點先打得快？
快，好似係打 BLOG 最必需要嘅法門，但其實世界唔係「唯快不破」。寫 BLOG 剛好就係一件好「慢」嘅事。如果你想寫 BLOG 做到好快嘅話，唔好意思，你真係想錯左。
你肯承受「慢」，但又想打得好，打得快，咁點呢？一係做 Content Farm，二係做 Wikipedia 改寫手，三就係你真心有野想講。
如果你真心有野想講，真心有野想分享，你寫 BLOG 自然快，但如果你無野寫，搵野寫，一係寫垃圾，一係就寫得慢，到頭來都係得個拮。
如其想下點樣寫 BLOG 快啲，點樣可以打字打得快啲，或者講完叫人打，不如直接俾錢人做，唔好自己做咁最快！因為當你為寫 BLOG 而寫 BLOG 嘅時候，係你未成功獲取回報時，江湖又會話寫 BLOG OUT 左，叫你做第啲野啦！
