一句話：邊個諗住結婚生仔嘅，請夫妻二人同四大長老一齊睇左先。作為一個有日以繼夜夜以繼日湊仔嘅老豆。睇呢套戲真係
1. 好想打個老豆。你無試過夜晚陪 BB，餵奶，氹佢瞓覺，你根本唔會知道有幾辛苦。如果唔係個年咁啱有夜波睇，有 Clubhouse 友一齊傾下波，都唔知點捱。
2. 換片，沖奶，沖涼，發燒陪佢沖涼降溫，成套戲好真實，每個場面除左泵奶無我份，真係樣樣都落過手。返工個種辛苦同湊仔個種辛苦完全係兩回事，返工肯肯定輕鬆過湊仔。
3. 換片又唔識，沖奶粉又唔識，呢啲老豆真係唔得。不過咁，個時係醫院都真係見過有個老豆咩都唔知，個女裝餓叫佢食麵包，要隔離床幫佢沖奶，痴線！
4. 叫阿嫲講少句。一個就無湊過女，一個就完全看輕哂作件事。根本依家湊細路辛苦過以前多多聲，芬保母講得啱，以前有得食，有得訓，有得便便就得，依家社會唔同，成件事要求高好多。好彩我家四大長老無咁多意見，幫手無出聲，無強加佢個套落去，無劇中呢啲糾紛。好多時候真係出少句聲當幫忙，唔出聲無人當你啞嫁！
5. 離開下，行下沙灘放鬆下，離開一下個種喊聲真係好重要。係沙灘行下好好地，個老豆講咩𡃁仔真係好得意，你怪個老婆啊！
6. 講番套戲，編劇同導演到底經歷過啲咩，每個畫面都有齊 message，由洗衫，搞野，打噴嚏等等，好多呢啲細位無湊過 BB 根本唔會明。
7. 全劇最靚個鏡頭，我覺得係 正背面影住 談善言 少少虎背雄腰 向前彎，好無奈咁泵奶同時照顧 BB，然後夜晚屋企空無一人慢慢拉 Wide. 如果呢個 Shot 由半身一路拉 Wide 至全屋 30秒就更加表達到了！
8. #談善言 真係做得好好，一個無人幫助嘅老母就係咁。根本唔會想講多句，苦不堪言，連抱怨都唔會。
9. 啲影評成日話咩女性角度，唔係女性角度，而係邊個近身湊就會係咁，拍嘅主角唔係媽媽，係湊嘅爸爸如我，都係一樣。
10. 其實都唔關咩係咪產後抑鬱事，呢樣只係俾個名佢，而係湊 BB 只要自己湊就係咁。身邊一定無人明。
