1. 我地先睇下訴求先。
- A. 『政府對白牌車問題視若無睹』
- B. 『改善收費滯後 20％』
- C. 『車主承擔過高保險費』
- D. 『提高司機收入，這樣會令司機駕駛態度更好』
- E. 『鼓勵新人入行』
2. 睇完訴求，有個疑問，到底呢個的士業界代表嘅係的士車主，定的士司機呢？
3. 的士對白牌車（即係 Uber 啦），全世界的士都不滿有新競爭，仲要有實力咁多，應該無份車主定司機。司機來講直接影響乘客減少，而車主就因為多左人揸 Uber，少左人揸的士，令的士車租供應多司機少的情況下，車租加唔加到。
4. 『改善收費滯後 20％』咩意思，指要加價 20％？加價 20％ 係咪有助司機就好難講，貴左係多客定少左客，一更司機當你賺 500-1000，加 20％ 車費真係可以加 20％ 收入？對司機來講，取消短加長減仲實際啦！但加 20％ 收費就係車主加租或者頂住個的士牌價嘅直接正面因素。
5. 『車主過高保險費』，咁呢樣就應該搵保險公司傾，而司機明顯就唔多關心。車主角度來。
6. 『提高司機收入』係咪可以更好駕駛態度，梗係得啦！你睇揸 Uber 收入高過的士，又有真. 投訴 評分制度，態度梗係好啦！話說的士其實都唔可以因目的地而拒載，同 Uber 司機客未上車唔知目的地一樣，但唔知點解的士又覺得有得睇目的地係好合理呢？
7. 『鼓勵新人入行』，作為司機 點會想新人入行爭飯食 肯肯定車主諗出來。
8. 其實的士個問題，唔駛考慮啲車主或者的士牌價就好簡單。三色的士搵日全部統一，然後強制的士證顯示改成『易通行』司機版顯示，確保真人，有得追蹤，然後再一步步改進。進一步，的士咪錶改成數碼版咪錶 有 GPS 追蹤，有司機認證及評分，再開放 API 連接俾 HKTAXI or Uber Taxi 個啲，也加入可以乘客可額外俾貼士，或加錢 Call 車，解決遙遠地方無車問題。至於 Uber 就合法化，一定要登記個人公司，買勞工保險，又全保。搞掂哂！
