1. 剛開始揸車時，主要都係用 高德地圖，貪佢線路講得清晰，多到煩！
2. 不過揸多左，大概知邊到打邊到，高德的缺點就開始出現，路況更新不及時，青馬大橋收費站成年都仲係限速 50km，無更新到，報錯都無用。而且，固定快相位外，其他都功能除 紅綠燈🚦倒數外，都唔係好用得著。
3. 當然，手機與車機並聯呢下係好野來的，但香港高樓多，車嘅 GPS 有時都唔係太準，反應不如手機有 AGPS 等輔助，車機愈用愈少了。
4. 用 Waze 有個好處，地圖 Google Maps 底，路線推薦有埋收費隧道價錢，係三隧收費轉來轉去情況下，單係呢個已經好有用！（唔知嚟緊會唔會真係2分鐘轉一轉價錢呢）
5. Waze 係揸車途中，道路擠塞唔係純用顏色代表，仲會加入時速，等你知道慢係有幾慢，係 5km, 15km 定 20km，配合埋距離，塞車都無咁噪！
6. 更好用嘅係，Waze 嘅互報功能。本身已經有固定快相，也都可以由車友報流動快相，警察，擠塞，封路，交通意外等等。以上呢啲都係一般行車地圖做唔到，因為實時嘅 Input 佢地仍然缺乏。
車友提交，你就可以即係時係 Waze 睇到，然後 Waze 又叫你幫手㩒個制 Double Check，令件事更加準確。（經過咗2019年，大家都應該明白呢類互動地圖嘅好處）
7. 石先生雖然都有訂 WESPEED，但喺快相，警察，擠塞呢啲反饋來講，Waze 反應係快少少。
8. 如果你日日用 Waze，揸車路線來來去去都係個幾到，Waze 嘅自動排序會幫你下一個目的地自動排第一。如果你有用 Google Calendar，你嘅行程，Waze 會問你係咪去個度，然後將目的地排第一，十分方便。
9. 講番第 （6） 條，其他車用地圖 App 有無得追上，加番個實時 Input 追上 Waze 呢？答案當然有，依家用 Waze 係要司機手動加入，但好似 Tesla 呢啲電動車已經大量鏡頭，再加 Machine Learning 去識別環境，只要佢地願意自己做車用地圖，然後將旗下每架車影到嘅路況實時上傳，由電腦分析見到咩，自動報快相、警察、擠塞呢啲，將會俾司機手動報更好，時差更短，準確度更高。
10. Waze 有好，當然有缺點，香港使用人唔算好多（根據 Waze 嘅地圖顯示）。如果用嘅人少，報嘅又唔夠多，大家唔互相幫助，其實互動功能就弱！咁效果就差了，例如你行大路依家梗係準啲，但偏遠少少，唔多人經就弱少少啦！
11. Waze 如果更新，加入埋違例泊車報告就更好，不過呢啲外國唔係勁常見嘅野，短期內都未必會有囉！
