困左係屋企一段時間,出街開始回復正常,終於都可以去番一啲香港景點,石先生早輪就把握機會去久違嘅山頂,唔去唔知,原來山頂纜車車站依家整緊,成個車站移前左,係橋底上車,用眼望就可以望到下一個站,真係變左你都唔知。當然係呢個臨時纜車站上車,無以前個㮔迫嘅感覺,加上人流有限,坐纜車可以揀位由不可能變成可能。
![](https://stoneip.info/wp-content/uploads/2020/05/20200314_145103-1024x577.jpg)
以往帶外地朋友來香港上山頂搭纜車的話,唔駛分開坐都算係咁,依家直頭可以揀位坐,真係好正。有得坐車頭望住架纜車上山,係石先生記憶中,呢個咁自在舒適嘅上山方法,對上一次體驗已經係細細個阿爸阿媽上山頂嘅時候,個陣時好似先剛剛有冷氣纜車無耐。而係個次之後,幾乎都係纜車太多人,直接選擇搭巴士、小巴上山,纜車遠離我地。
去山頂睇夜景外,依家可以做嘅就係去「杜莎夫人蠟像館」。無論喺香港還是外國,去一次,一個人要近 $300,莫講話外國旅行時間寶貴,未必去,最近少左旅客黎香港,去蠟像館呢個時間就真係 Perfect。最最最重要嘅係,依家有香港人買一送一優惠,兩個人都係 $290,一個人 $145,平左好多。
![](https://stoneip.info/wp-content/uploads/2020/05/20200314_151718-1024x768.jpg)
![](https://stoneip.info/wp-content/uploads/2020/05/20200314_151808-1024x768.jpg)
一入場後,可以去翻新無耐嘅「樂壇巨星」專區,可以喺 Looking Good Corner,搵 Jackson一齊來番張合照。不過,石先生同佢唔太熟,就無謂太貼身啦!一來唔多鐘意男男組合,二來怕得罪佢啲女粉絲,呢個同 Jackson 咁親密嘅接觸,都係留番俾佢啲女粉絲。Jackson 我地都係保持番少少距離好啲。
![](https://stoneip.info/wp-content/uploads/2020/05/20200314_151903-1024x768.jpg)
![](https://stoneip.info/wp-content/uploads/2020/05/20200314_153529-1024x768.jpg)
相比起演藝明星,兩位美國總統係做戲之餘,又要度橋,真係辛苦過演員好多。演員在聽到 Action 後演戲,政治人物每分每秒都要演戲,一舉手一投足都要度過,唔係邊得來咁多選票,你唔通真係以為總統咁易做。
係 Trump 與女王之間,Trump 嘅神粹真係好似,但相比起英女王嘅慈祥外婆感覺又係兩回事來,估唔到可以做得咁似,而雖然無見過真人,但同電視上見到嘅真係九成似。
如果你細心應該留意到,成個場好以俾石先生包左咁,影親相都無其他人影係身邊。無錯!石先生真係好似包場咁,成個「杜莎夫人蠟像館」得我地幾個人,一路影一路玩都無其他人,連工作人員都無個,開心個包場,因為係入面訓覺都仲得。有幾無人?睇下以下呢條片就明,明白點解依家係入場嘅好時機。
![](https://stoneip.info/wp-content/uploads/2020/05/20200314_154256-1024x768.jpg)
想點同草間彌生影相可以利用區內鏡嘅反射,形成無限空間,真係點影都得,影佢近鏡又得,擺好位慢慢影又得!
![](https://stoneip.info/wp-content/uploads/2020/05/20200314_154503-e1590221568998-768x1024.jpg)
![](https://stoneip.info/wp-content/uploads/2020/05/20200314_155450-1024x768.jpg)
除左影硬照,而家仲可以用盡個場來做你想做嘅事。Bruce Lee 飛踢由細睇到大,但要影俾佢飛踢石先生就拿 S20 Ultra 出來配合佢個慢動作拍攝,直接拍出截拳道嘅利害。
除左影啲搞笑照,當然要記得兩位 oppa 及兩位曼聯球星,而最估唔到係崔始源竟然咁矮,平時真係睇唔出。
喺早前介紹咗嘅「樂壇巨星」專區,區入面有兩間唱 K 房想入就入,入到去唔止係同兩位阿姐影相,而係當休息咁入去唱左幾首歌,連唱 K 都可以係館內做埋,可惜係本身設計係俾人影相,無高椅,否則俾一個價錢,唱番兩個鐘都咪話唔過癮。除左唱歌,館內仲有動漫區,可以同蜘蛛俠、IRON MAN、HULK 等合照。
![](https://stoneip.info/wp-content/uploads/2020/05/20200314_162151-e1590221486804-768x1024.jpg)
如果想地道啲,仲可以同麥兜麥太坐電車合照,不過相比之前嘅真人就無咁過癮啦!除左去「杜莎夫人蠟像館」,今次上山仲去埋 3D 影相館,大富翁館及飲香港唯一一間嘅奈雪之茶,當然最後唔少得去埋白加道纜車站影纜車及睇番久違嘅香港全貌。
![](https://stoneip.info/wp-content/uploads/2020/05/20200314_180155-1024x768.jpg)
![](https://stoneip.info/wp-content/uploads/2020/05/20200314_173014-1024x768.jpg)