家居裝修紀錄（17）- Lockly Secure Pro Latch Lock 開箱評測：終於有個啱心水嘅智能鎖

家居裝修紀錄系列雖然進度緩慢，但石先生遇到家居野都會持續更新，留個底自己記得之餘，也都希望幫到大家。

今次同大家分享嘅係家居門鎖 – Lockly Secure Pro Latch Lock，佢功能上有指紋、密碼鎖，手機遙距開關鎖、限時密碼等，也都支援 Google Assistant 及 Alexa，可以配合石先生全屋嘅 Google Home，有更多玩法。

換鎖的背景係當年死都唔用 Samsung

講講背景，當年入伙時，石先生已經一心一意就決定唔會用香港常見嘅插芯鎖（Mortise Lock）。因為呢種門鎖睇來安全，但其實有心人要爆你屋企大門，根本唔會向你個門鎖落手，係會主攻大門門框等其他弱點。

另一個重要原因就係呢類插芯鎖（Mortise Lock）本身對門嘅長形開孔各有唔同要求，例如一般 Samsung 嘅開孔會比 Yale 大。當你裝左 Samsung 後，第時壞左或者想換 Yale 或者其他牌子時就會發現開孔大得滯，要搵番野檔住個開孔位，唔夠美觀。（你估換門平呀～）

而且 Mortise Lock 安裝較圓形開孔適用嘅 Deadbolt 或者 Latch 鎖開孔及閂框配合上都較複雜，無辦法自己裝，所以有咩事壞左又要搵師傅來搞，對於石先生呢啲想盡量每一樣野都自己搞掂嘅人來講，就唔太適合。

YRL220
YRD220

第一次買鎖唔知門厚度好重要

當年入伙時，由於香港仲未有「真正」嘅智能門鎖。香港賣嘅智能門鎖無論係 Samsung 定 Yale 都只係得「指紋」、「密碼」、「拍卡」或者「KEY」，無得連接互聯網做到遙距開門，或者配合 Google / Alexa 等做一連串動作（例如：偵測關門屋企無人自動關全屋電器）。

因此，當年水貨買左可以配合 SmartThings 的 Yale YRL220-ZB Latch Lock（上左圖），但第一次買加上對安裝門鎖呢樣野唔熟，唔知道原來裝門鎖係需要留意門嘅厚度，導致因為 YRL220 門厚差左 2cm（裝左個鎖兩日先發現原來差 2cm…），導致後來被迫臨時買個多 5cm 嘅 YRD220 Deadbolt（上右圖）先成功安裝。

結果係用住先，頂住先嘅情況下一直用左兩年幾，但 Deadbolt 始終唔係 Latch，係大門用始終唔方便，所以一直等等等，等到依家終於換左呢款 Lockly Secure Pro Latch Lock，符合哂以上講嘅幾樣要求。

Latch 即斜邊，可以一推門自動鎖
Deadbolt 即一條芯推出來，要自己擰先識鎖

大門圓形開孔

Lockly Secure 本身都有出 Mortise , Deadbolt 及 Latch 三種類型嘅門鎖，而石先生因為屋企需要嘅關係，係揀左行大門圓形開孔有柄嘅 Latch 門鎖。

雖然石先生買嘅係 Lockly Secure PRO，但來貨嘅係 Secure Plus + Secure Link。原因？因為咁樣加埋就 = PRO 版本，只係包裝無放埋一齊。

為免重複犯錯，石先生買嘅時候已經做好功課，度清楚個門口（Door Thickness）係符合要求嘅 35mm-50mm 內，而且門嘅圓形開孔係標準之一嘅 54mm Hole & 25mm Latch Hole，門嘅開孔係 60mm 或 70mm，係尺寸上完全啱用。

如果唔多明嘅話，可以睇以下呢兩張圖，係 Lockly 包裝內跟嘅圖紙，俾啲外國人自己係門到開孔用的，但香港買門嘅時候，如前述一樣門公司係會幫大家開孔的了，所以唔駛太擔心。

開箱有啲咩？

打開 Lockly Secure Plus 即門鎖本身嘅包裝，可以見到上圖嘅野，由左至右，上而下分別係：說明書、兩條分別 60mm 及 70mm 嘅鎖芯、需要用到嘅各種螺絲（獨立包裝）、4 枚 AA 電池、KEY、用來連結前門鎖的門鎖柱、鎖面、後面的背板及內鎖。

先拆 Yale 舊鎖

係裝新鎖前，石先生當然係要先拆舊鎖，也俾大家望望舊嘅 Yale YRD220 係點樣。鎖本身係室內唔難拆，一個十字批就搞掂，先拆遮住電池嘅頂蓋，然後再拆幾粒固定前後鎖嘅螺絲，及解除埋門邊嘅固定就搞掂，一啲都唔難。（特別係當你自己裝過，再拆番出來根本無難度。）

Lockly 鎖芯有兩個

拆完 Yale 個舊鎖，正式開始裝 Lockly Secure Plus 嘅時候先發現，Lockly 真係「用心做鎖」，因為單係鎖芯就有 60mm 及 70mm 兩個係到，直接按尺寸來使用。而之前用嘅 Yale 就係用伸長嘅方式，令一個鎖芯做到兩個尺寸，好慳皮～

裝鎖過程

將適合尺寸嘅鎖芯放入圓形開孔，然後再擰上門邊兩枚固定螺絲便可。如果係第一次裝的話，石先生建議唔好上太實，因為後面你可能為左就位要擰返出來，所以最好等一切都搞掂哂先擰實佢。

裝好鎖芯後，就可以開始裝門鎖正面（鎖面）。與之前嘅 Yale 門鎖柱唔同，佢嘅門鎖柱係分開的，所以佢係門鎖柱個尾到有一個孔，用來固定番係鎖前個個位置。

佢本身有配番一條好簡單嘅鐵線俾你放入去再擰實固定，好簡單也都無特別，大家第一次裝嘅時候直接擰實就得，唔駛太擔心。

固定好後，將呢個門鎖柱對住門上嘅門芯正方形位，直接插入去就可以裝好鎖面嘅部份。　

來到呢個位，當你見到門鎖柱已經係內鎖個邊突出來，基本上都 OK，而說明書係呢個時候都會叫你繼續裝埋內鎖個部份，但石先生建議大家無論裝咩鎖，係呢個時候都先拿條 KEY 出來，插入鎖面，擰一擰，睇下係咪可以順利咁控制到門芯。

好似下圖咁，入左 KEY，擰向下可以開到 Latch 咁就叫 OK。因為如果你依家唔試，跟住說明書去到最後先試，然後唔小心發現自己裝錯左，擰時無反應，或者向上先可以開到個 Latch，咁就要拆過再裝，費時失事。

然後，拿內鎖嘅底板出來，將佢同鎖面固定。與 Yale 慳皮唔同，Lockly 真係從 DIY 思維來做野，係左門鎖柱兩邊嘅固定螺絲位，本身有兩條俾你固定位置嘅長條，等你可以簡單攝係鎖面內嘅螺絲帽上，方便你放內鎖底板位置時唔會歪位，咁之後擰螺絲就好方便。

上好門鎖柱兩邊嘅螺絲後，你就唔再需要用手托住個鎖面，成個鎖已經可以固定係門上，而 Lockly 嘅內鎖板上半部份有雙面膠紙係到，可以直接用來固定上半部，等啲位再準確多少少。

內鎖底板固定後，再放埋內鎖嘅主體，對準番內鎖門柄位上螺絲。與上面裝鎖面時一樣，螺絲兩邊擰左八九成後，可以試下擰門柄，睇下 Latch 有無反應，方向啱唔啱。如果方向啱就可以試下關門度下位，睇下有無咩其他問題。

咩事都無就擰實啲螺絲，再入埋 4 粒 AA 電，封面內鎖蓋便可。因為你已經完成左裝鎖呢個步驟。如果行 KEY，唔行任何 Smart 功能，你度門已經用得。（當然，你個門框本身要開孔！個部份擰螺絲就得，唔講了！）

手機連接

手機連接做法好簡單，大家用左超過 10年智能手機，只要下載佢地嘅 App – Lockly，然後按指示輸入 Email / Password。

比較重要係你開盒時會見到有一張卡，寫住 Door Serial 及 Initial CODE，呢張卡係第一次登記手機 App 時必需要用到，而佢係你認證擁有呢把鎖的唯一方法，所以千萬千萬唔可以丟棄，否則無人幫到你。登記完後將佢收藏係一個安全的地方吧！

App 基本上分三部份，第一部份係首頁，無論你用藍牙還是 WiFi 連接，你係都會見到「開門」「關門」選項，想用手機開關門就靠佢啦。

第二部份係紀錄，你可以通過呢個紀錄睇到有咩人用咩方法開門，例如石先生自己就分別紀錄左右手指紋，所以你可以見到開門有 Stone Left，代表了 Stone 左手開門。除了這個指紋開鎖外，使用密碼開鎖、KEY 開鎖、手機開鎖、互聯網開鎖或一次性密碼開鎖等都可以知道。

至於第三部份係「許可權」，也係你設定各種開門方式的地方，下文再談。至於第四部份設定係包括稍後安裝 Secure Link 都係到進行，但第一次揀好後都唔駛點再搞。

家庭成員及指紋開鎖

「許可權」呢到第一個要設嘅係「門鎖密碼」位置加埋屋企人入去。雖然你都可以係到設定屋企人嘅指紋、密碼等等，但如果屋企人想要有遙控開關門功能，咁你就要係到加佢，然後生成一個認證碼，然後係屋企人手機安裝 Lockly App 再登入確認，咁屋企人都會有手機遙距開關門能力。屋企人想遙距開關門都唔駛叫你，可以自己來。

至於「指紋」部份，最簡單係係到設定哂全部屋企人嘅指紋，咁應該係處理上最簡單，而除左常用手外，石先生個人習慣加多一隻手指，方便一旦左手拿住餸時，右手都可以開門。

Lockly 起家之作 – PIN Genie

我地係設定密碼的時候，係普通入數字，但係鎖面輸入密碼時就需要使用 Lockly 起家之作的 PIN Genie 技術開鎖。

PIN Genie 原理是捨棄傳統的 10 位鍵，改用 4 個圈圈，每個圈圈代表 3 個數字，輸入密碼時按相應嘅圈圈就得。每次輸入密碼時，每個圈圈代表的數字都唔同，咁就算有人睇住你按密碼，跟住按都開唔到門。以上圖為例「左上」圈代表 2 6 5，「左下」圈代表 3 4 7，「右上」圈代表 8 0 1，「右下」圈代表 0 9 3。

假設密碼係 123456。咁輸入密碼嘅時候，
次序就係「右上」「左上」「左下」或「右下」「左下」「左上」「左上」

由於每次輸入密碼時 4 個圈圈顯示嘅數字都唔同，所以望住入都估唔到。特別係 4 圈圈入面嘅數字，有其中 2 個會重複顯示，令變化組合更大，撞都有排撞。

離線密碼（OAC）

呢個離線密碼（OAC）主要係一次性，俾大家可以分享朋友、鐘點姐姐或者任何有需要嘅人使用。佢嘅操作好簡單。你可以係手機 app 設定有效日期及時間期限，然後輸入用家名，就可以生成一個 8 位數嘅密碼，然後將頁面或截圖分享俾朋友，佢再跟住個步驟，輸入兩次密碼就可以開門，簡單方便。

呢個 OAC 叫得離線密碼，佢嘅強項係你係設定時不需要貼住到門。即係話即使你係公司，但你突然想幫外母開門，除左打開手機 app 按開門外，也可以用呢個 OAC 即時係手機設定，然後再發送截圖俾佢。

聽落好神奇，但背後嘅執行原理同我地用開銀行 Online Banking 嘅一次性密碼卡一樣，係通過算法去做，所以做到離線都得咁神奇。

令門鎖識上網的 Secure Link

Secure Link 包含兩件主要工具，一個係插 USB 的 WiFi Hub，另一個係好常見嘅門磁。由於 Locky Secure Plus Latch 本身係用藍牙運作，並不具備 Internet 能力，所以你如果想把鎖上網的話，就需要用 Secure Link。

而 USB WiFi Hub 就係一個接收 WiFi 訊號，然後指揮你把鎖嘅工具，即係話你係手機嘅指令：
「未有 Secure Link」：Mobile > 藍牙 > Lock。
「有 Secure Link 後」：Mobile > Internet > Secure Link > 藍牙 > Lock

由於 Secure Link 係用藍牙將訊號發去 Lockly 門鎖，所以你擺放 Secure Link 的距離最好係 10 米內，愈近愈好。

至於搭配嘅門磁就係配合 Secure Link 做多一重確認開關門的動作。所以你望到上圖，石先生用左 Secure Link 後首頁顯示方式唔同左，多左一個橙色圈顯示電量，然後下面有寫住「門磁關/門關」嘅字樣，特別適合係遙距開關門後確認到底門開了鎖後，有無關到門，還是持續被開門，無關上。

連結 Google Home

Lockly 連接去 Google Home 好簡單，同平時連接其他支援 Google Home 產品一樣，按左上角「+」，選擇「設定裝置」，選擇「合作夥伴」，尋找「Lockly Smart Home」，輸入登入資料，然後輸入一個 4 位數的 PIN Code 以便使用 Google 開門時，作一次確認。

以石先生叫門鎖做「Lockly Door Lock」為例，利用 Google Home 開門的口令便是「Ok Google, Open Lockly Door Lock」，然後 Google 會講「Can I have your Security Code」，此時說出設定時的 4 位 PIN Code 便會自動開門。

總結

由安裝到使用，石先生已經用了超過一周時間。感想係：正。因為 Lockly Secure Pro Latch Lock 滿足了石先生需要：Latch Lock、指紋、密碼、一次性密碼、遙距開門、支援 Google Home 的多種複雜需求，而且 Lockly 雖然叫做一間美國公司，但係香港有辦公室，有咩事搵人都可以搵到。