人到桂林，目的就係要參加 GoPro 活動，體驗最新嘅 GoPro Hero 5 Black 及 5 Session。石先生由細到大都聽過「桂林山水甲天下」呢句話，所以有機會來望下都幾開心，不過一來到桂林機場，你望下佢嘅設施就可以想像到佢嘅城市規模有幾大，從而想像到呢到到底係一個咩城市。
桂林機場唔大，同好多中國機場一樣，佢都有分內陸線及國際港澳台線，而國際港澳台線嘅規模就更細，由落機開始去到行李帶幾步路就搞掂，而行李提取區更只有兩條行李帶，你已經可以估到呢個機場有幾多國際港澳台航班。
設施來講，桂林機場其實唔算好舊，都係維持幾好嘅狀態，以中國機場來講其實無咩大灰塵算好好，而且係中國特色社會來講都算整齊，以中國二三線城市來講算唔錯。
雖然我地細細個就聽到「桂林」兩個字，但其實桂林唔算一個發展好好嘅城市。呢個話唔係石先生講，係一位司機講嘅！
話說石先生一行人係旅程最後一日坐私家車由景點去機場出發，成車香港人係車上當然講廣東話，而桂林因為係屬於廣西，司機其實都識廣東話，所以我地講嘅野司機都識聽。
講起桂林呢個地方，大家都有啲感嘆想像與現實有啲差距，因為桂林景色算靚，但全程唔多見大商場，也都唔見咩超市，商業街，反而好多工地係到修路等等，有啲似仍在發展中嘅東南亞。
因為我地一行人都無咩去咩景點，所以都有少少質疑自已嘅想法，懷疑係咪自已無去到市區先會有呢種感覺。
係呢個時候，明明識聽廣東話嘅司機都忍唔住，佢出聲話我地無錯，其實桂林唔係咩大城市，以中國情況來講，連三線城市都算不上，只係旅遊發展得早，所以大家先有桂林係一個大城市嘅錯覺。
司機咁講我地其實無咩震驚，因為小城市嘅人民同常都好平實，有個句講個句，始終自已知自已事，唔會亂咁吹，反而有啲大城市嘅先會係又吹唔係又吹，令人反感。司機大哥後來都同我地認證左一樣野，就係桂林本身唔算好有錢，所以一切仲係慢慢發展。
因為桂林國際港澳台航班有限，石先生一行人返香港都要轉機，無得由桂林直飛香港，要由桂林先飛廈門，再飛香港，也都有機會見識到桂林機場嘅內陸線航廈。
一如預料，內陸線航廈係暗暗地無咩燈，樓底唔算高，加上好多商店，成個感覺都係有啲擠擁，完全係中國大部份二三線城市嘅舊式機場設計。
不過，桂林唔知係咪中國遊客太多，機場設施太舊，國內線排隊過關大排長龍，石先生等人排左三十分鐘都入唔到，而關員又愛理不理，最後要出動到遲到原因，利用中國式打尖先可以過關，真係返少啲大陸，唔知點應乎呢啲場面都出事。
講左咁耐，桂林風景好唔好呢？真係幾好，同我地細細個睇個啲「桂林山水甲天下」圖係一樣，加上馬路兩邊好多田，好容易就會影到桂林呢種獨特嘅山水風景。
值唔值得去呢？以石先生呢個咁簡單嘅行程，走馬看花來睇，桂林風景係幾靚，但要去旅行仲有好多地方選擇，係機票住宿都唔係特別平嘅情況下，其實去第度仲好啦！
