去東京嘅次數雖然一對手都唔夠數,但始終都搞唔清左啲鐵路咩打咩,因為實在太太太多選擇啦!每次去都要搵番幅鐵路圖出來慢慢睇。
問題係東京真係太多鐵路,JR、Metro、都營地下鐵、電車、輕軌,多到睇 Google Map 都唔掂。特別係每次搵地方住時,真係無得唔睇地圖。為免次次都慢慢搵,決定都係收藏哂東京常用係到方便自己。
至於什麼一日劵、三日劵等等,石先生唔多用的,所以不在此限。
JR 東日本地圖
中間綠色個條就係知名嘅「山手線」,石先生覺得知名嘅原因係佢經過大部份東京旅遊京點,第一次去真係識搭佢就得,但站多繞路由東去西真心唔夠快,去得多嘅都搵到其他路線選擇避開山手線。
想理解東京嘅大概,睇佢就啱哂,下圖按即開啟全尺寸 PDF 版本。
![](https://stoneip.info/wp-content/uploads/2018/12/JR_Tokyo_Map-e1545937296353.png)
地鐵路線圖
由於 JR 東日本個啲叫「鐵路」,因此東京達人會話你知以下呢堆先叫「地鐵」,而由於東京嘅「地鐵」仲有分「東京地鐵」及「都營地下鐵」,所以你不幸遇上東京魔人嘅話,佢或者會再串你分唔清楚。
不過點都好,唔駛驚,因為你只要有一張日本嘅 IC 卡(即八達通),就咩鐵都搭得,唔理佢係「地鐵」「都營地下鐵」或「JR 東日本」嘅鐵路。
除左 JR 東日本嘅鐵路外,地鐵都係東京嘅重要交通,好多快過「山手線」嘅鐵路都係地鐵。麻煩係市區地鐵嘅站口唔明顯,特別係係渉谷、新宿、東京站呢啲 JR 大站,到時睇清楚標誌。
![](https://stoneip.info/wp-content/uploads/2018/12/tokyo_rail_metro_map.png)
高達壽司線
高達壽司線呢個名係石先生自己改嘅,正名應該係「百合海鷗線」。佢最主要就係「台場」站睇 1:1 高達、「青海」站睇 Toyota、TeamLab 或者 Outlet 及最新去「市場前」站食壽司。
搭呢條線嘅,多數都係「新橋」站上車,因為新橋站有 JR 東日本嘅「山手線」,也都有「地鐵」,算係最初階方便。
![](https://stoneip.info/wp-content/uploads/2018/12/gundam.jpg)
小田急線 – 去鎌倉江之島
「小田急線」搭嘅人主要都係一個目的,去鎌倉及江之島一日或兩日遊。簡單可以直搭去「片瀨江之島」站,再轉綠色車廂嘅「江之電」,由江之島出發去到 N 咁多人嘅「鎌倉高校前」影沒有籃球之籃球路口,再去「長谷」睇鎌倉大佛,再一路去鎌倉。
![](https://stoneip.info/wp-content/uploads/2018/12/odakyu-line-route-map.png)
![](https://stoneip.info/wp-content/uploads/2018/12/enoshima.jpg)
不過石先生係搭「JR 東海道線」去「大船」站,轉「湘南單軌電車江之島線」落江之島,再搭「江之電」的,因為想搭「湘南單軌電車江之島線」。
![](https://stoneip.info/wp-content/uploads/2018/12/map-broad-e1545939047238.png)
以上圖片及 PDF 全部來自各鐵路公司,詳細請到鐵路公司觀看,按圖即可前往。