Mobile Payment 講得多，今日同大家講講誠哥公司有份入股投資嘅 AlipayHK 背後嘅安全及運作等等。
AlipayHK 雖然中文名叫「支付寶香港」都有「支付寶」三個字，但你有留意新聞嘅都明，係中國大陸做得起嘅公司都要配合國策。本身好好地嘅系統都要加入一啲配合國家嘅安全政策，例如中國大陸玩網絡實名制，無中國身份證（回鄉卡都得），無中國大陸電話號碼，基本上唔駛用，但呢啲中國大陸互聯網法則只係適合係中國大陸，莫講話過唔到太平洋去美國，就連深圳河都過唔到。
正因如此，幾乎所有嘅中國大陸互聯網公司想「走出去」都要砍掉重練，重新建立一套符合世界標準（不含中國）嘅系統。「支付寶」想做中國大陸以外嘅生意，就唯有另外開發另一套世界安全標準嘅「支付寶香港」AlipayHK 出來，否則單係信心、安全性一環，AlipayHK 永遠都搞唔掂。
AlipayHK 初登陸時梗係水土不服啦！雖然短短兩星期有 5 萬人用，但係無咩實體店收款嘅情況下，或者大部份 AlipayHK 用戶只係用來俾淘寶錢。不過咁，你有價值，人有價值，只要雙方價值能夠拼埋就有機會，所以 AlipayHK 後來終於搵到戶好人家 – 和黃（00001.HK）入股，加入更多支援嘅商戶，加入香港元素，加入更多安全措施令人安心，做一個有香港思想嘅 Mobile Payment。
如同石先生當日係專欄咁講，「支付寶」睇上「和黃」唔應該單為左香港市場，而「和黃」同「支付寶」合作也唔應該只係想做掂香港，更大嘅目標或者係想 AlipayHK 係香港成功後複製去「和黃」有哂連繫嘅歐洲市場。
要做到入香港呢一點，AlipayHK 當然唔可以行大陸個套，所以 AlipayHK 實際上係一間名為：Alipay Payment Services (HK) Limited 嘅香港註冊公司，獨立於「支付寶」，AlipayHK 同支付寶兩邊嘅數唔可以互通，安全有番保障，AlipayHK Apps 也都唔同，加上砍掉重練所以成個 Apps 望落都有啲唔習慣。
插問：解答你一個疑問：AlipayHK 又話唔同公司，咁點解淘寶又收佢錢？
插答：因為 AlipayHK 股東包括螞蟻金服及和黃，而螞蟻金服母公司係阿里巴巴集團，所以一切係阿里巴巴集團旗下嘅服務例如「淘寶」「支付寶」梗係接受佢俾錢啦！屈臣氏、百佳極快接受 AlipayHK 俾錢嘅道理都係一樣。
因為 AlipayHK 係一間香港公司，所以係法例上要遵守嘅規定係 HKMA（香港金融管理局）嘅《支付系統及儲值支付工具條例》，所以由頭驗到你落腳嘅「芝麻信用」係唔關事的，安全唔少，唔怕借書遲還都扣分。AlipayHK 安全保障方便係需要根據 HKMA 嘅條例來執行。而儲值金額未達到一定水平前，其實我地做用戶係唔駛「實名認證」，也唔需要綁信用卡、銀行戶口等等。
講到呢到，大家應該明 AlipayHK 同「支付寶」嘅分別，下次再講 AlipayHK 嘅時候唔好再將「支付寶」劃成等號，因為兩樣野係唔同的，OKAY？
