話說早兩日等睇波嘅時候，收到來自 EyeEm 嘅通知，原來上載係 EyeEm 嘅相終於都有回報，收到錢啦！
本身用 EyeEm 呢個平台嘅目標都係想收錢，因為 EyeEm 本身同 Getty Image 有合作，所以放上去分享嘅相，如果本身你都想賣，然後又有足夠質素嘅話除左係 EyeEm Market 可以掛牌出售之外，仲可以上到 Getty Images。因此，大家先會係 EyeEm 搵到小弟嘅作品。
可能你話會依家 Online 搵相咁方便，仲有咩人會俾錢買相，但現實係世界上仲有好多商業機構真係要買相，唔可以冒盜版嘅風險，所以賣相依然係有少少錢途的。
言歸正傳，EyeEm 發左通知後，石先生當然按入去睇下點拿錢同幾多錢。根據通知，其實今次賣出嘅相片係經過 Getty Images 售出。雖然 Getty Images 單張相片嘅發售價格好貴，但其實 Getty Images 都有好多合作伙伴，好多唔同嘅 License，所以大家按入去 Getty Images 入面見到一張相成千蚊，其實就唔代表真係買個個要俾成千蚊。
因為你買一張就成千蚊，但買好多張當然有打折，而對於唔少會買相嘅商業機構來講，其實好多時候都係買好多相的，所以會買相梗係買套餐。
正因為咁，所以石先生賣出呢張相嘅價值係：US$2，約港幣 14 元。話多唔多，話少又唔算少，總好過放上去 Facebook, Instagram 然後俾 Mark 用使用條款拿走左。
要拿到呢筆錢，石先生首先要有一個 PayPal 戶口，輸入然後 EyeEm 就會將錢過入你 PayPal，就係咁簡單。收錢呢個位除左有 Payout 資訊外，其實也都有 Payout History，所以你想睇到過去俾左通過賣相賺到幾多錢都可以係到知道。
按說明，石先生每賣出一張相要同 EyeEm 分 50%，加上本身 Getty Images 又要賺錢，所以該相片嘅價值應該遠高於 US$2，但到底幾多錢呢？石先生就無去理會了，因為 EyeEm 算係一個最易入口嘅分享及賣相平台，有少少社交元素得來又可以賺錢。如果係一心一意去賣相嘅話，單係填個啲申請表及搞手續都好多個月，職業就話無辦法，業餘嘅都係用 EyeEm 玩下算啦！
（由上傳第一張 EyeEm 相片，到 Getty Images 上架搞左兩三個月，然後到賣出又再一個月，所以放得上去都唔好太有期待，順其自然會開心啲。）
因為 EyeEm 成功幫石先生賣出第一張相嘅關係，石先生也決定將過去咁多年影落，又過到自己嘅相都放哂上 EyeEm，即管博一博。
如果你係 EyeEm 睇相嘅時候，你會發現呢個平台好多攝影師都會影極蓋術性嘅相，真係好好睇好吸心心，但買相嘅人係咪真係要呢啲藝術性咁高嘅相呢？還是只係要一啲配圖呢？
由於真正買圖嘅人係係 Getty Images，所以石先生也都上 Getty Images 睇下啲圖，唔少其實都係大環境相、新聞圖片、配圖、地標等等，新聞角度，寫實居多，與 EyeEm 嘅極藝術又好唔同，所以係以賣相為前題之下，未來都係上傳多啲大環境、寫實類相片，反正呢啲都係石先生相對強嘅相片。
至於好玩色，玩角度，玩美感嘅相片，都係留番俾攝影師們吧！
