香港政府終於都對樓市出招，林鄭特首這六招到底有咩目的，係重建置業階梯，還是要令樓價下跌各有睇法。如果你覺得此六招可以令樓價下跌，或者都真係有啲天真。
香港樓價唔係增加供應就可以減到，有樓嘅想要多層樓收租，保值，加上北面嘅買家，再多嘅供應都唔會應乎到需求，加上以投資環境來講，磚頭值錢過股票，樓價邊有咁易跌。如果政府出招樓市就跌，香港樓市咁脆弱，咁香港人就唔會對買樓有咁大需求啦！
能否重建置業階梯唔單單要睇階梯有幾多級，每級有幾高，仲要睇下本身有幾多能力上呢條階梯。即使居屋樓價下降，樓價對香港人嘅負擔仍然好高，同廿卅年前嘅負擔水平完全兩回事。即使政府用居屋減價人為調整階梯嘅厚度，門檻始終都係高，那有以往咁好爬。
反過來說，石先生始終認為香港政府自當年「負資產」後，十幾年來都係想避免社會再有大批「負資產」。係市民「無樓揸手」與「負資產」之間，石先生始終相信政府係會寧願市民「無樓揸手」，都唔想有樓揸手，然後「負資產」。
因為「負資產」對社會嘅影響唔單止係民怨，大量嘅「負資產」仲會影響市民可消費嘅金額，影響內部經濟令經濟停擺，消磨市民嘅意志，最終會衍生更多難以解決嘅社會問題。
既然係咁，係經濟總有一日向下跑，樓價總有一日跌嘅情況之下，如何避免大量「負資產」，縮短「負資產」嘅影響時間就係重中之重。
叫市民買樓唔現實，咁俾啲平少少嘅樓市民買。即使之後加息，供樓壓力上升，然後經濟向下滑，資產開始貶值，都仲可以救到呢批市民。因為買居屋嘅，唔少係剛剛好過到壓力測試嘅市民，呢批人唔係買居屋就係買靠發展商嘅一手樓用首置優惠來置業。
居屋七折變五折，當中有 20% 差價。私樓與居屋嘅差價對比上來就更大，將呢批人由發展商首置吸過來買居屋，令佢地擁有嘅資產價值較低。當未來經濟下滑時導致「負資產」出現，差價係銀碼上都會細啲，捱「負資產」嘅時間也都短啲。
居屋數量有限，但係私樓與居屋價差大得有點吸引，令部份剛剛好上車嘅市民都會寧願等而放棄私樓，未來「負資產」嘅市民數量也都會少啲。至於繼續買得起私樓嘅，政府似乎相信你頂得住經濟下滑，即使「負資產」都唔會影響到你，加油。
題外話，如果私樓與居屋價差真係大得令市民只買居屋不買私樓，咁政府一來要大增居屋供應，二來要想下如何令市場有屋俾人租。雖然依家二手市場空置率有限，但或者都係做兩手準備，以免第時有樓無得租比較好。
