做 Online 係近來嘅潮流，但始終做 Online 唔同做 Offline，唔係開間舖係商場就有人入去行，有人買野。做 Online 就好似將間舖開係火車沿線一樣，有好多人係火車上面，但有無人落車去你舖頭望下，或者買野，就睇你有無辦法吸引火車嘅人落車了。
有人覺得做 Online 只要開左 Online 就得，因為有人搭火車，自然有人落車，但事實上係搭火車嘅人多，火車線也多，但火車站一樣咁多。咁多個火車站，點解要係你個個站落車，先係最大嘅疑問。
香港地鐵都有好多個站，但總會有一個半個你未試過係個度落車出閘。如果你做 Online 只係開左個車站，但唔想辦法吸引人落車，咁你個火車站就好似呢啲冷門車站一樣，永遠都無人流，無生意。
火車線咁多條，有 Forum 線，有 Facebook 線，有 Twitter 線，有 IG 線，有 Google 線，你想吸引咩線嘅乘客係你個站落車最有效益，就唯有講經驗講數據了。
早輪市場上好多人覺得吸引 Facebook 線嘅乘客落車成本效益最高，但隨著係 Facebook 線落廣告嘅人愈來愈多，市場上嘅行銷專家開始叫大家轉線，轉為吸引 Google 線嘅乘客。
正所謂條條大路通羅馬，當你搭厭左 Facebook 線，自然會轉下搭其他線，望下沿途好風光。不論係新線定舊線，對乘客來講，有風景吸引嘅自然係好線。不論你係 Facebook 線做宣傳吸引乘客落車又好，係 Google 線吸引乘客落車又好，係 IG 線吸引乘客落車又好，其實最緊要都係成功吸引乘客落車。
如果你做 Online 但又唔肯向火車上嘅乘客宣傳自己個車站，咁就不如唔好做啦！
