作為一個識少少 IT 嘅普通人,石先生當然不時都會收到一啲朋友嘅查詢,當中「整網站」最常見。第一句多數都係:「喂!識唔識人整網站?唔複雜。」

聽到呢種說法通常都心知不妙,因為整網頁睇個個好易,做個個其實好複雜。構思個個往往都會低估左做個個嘅難度。當你問即係點嘅時候,多數會接呢句:「度好哂,有埋設計師畫好哂圖樣,跟住執就掂,係唔識砌 Code 要搵人幫手。」

如果唔識嘅,最好嘅做法都係直接答「無」。因為想個個以為做網站好似當年用 Dreamweaver 或者依家 WIX 咁搬下位就得,忽略左網站背後 CMS, Database 等項目,就算介紹人或公司俾佢,都係浪費時間居多,無謂害人。

當然,朋友問到唔會就咁答「無」,會問多兩句其實想做咩,叫佢拿啲 Reference 出來望下,睇下成件事嘅差距有幾大。願意講出來想做咩嘅,不時又有三個反應。

一係其實佢想做個好似 WhatsApp 或者 Facebook 咁嘅野出來,難度絕對爆錶,但佢覺得只係做個網站出來俾人留下言,Upload 下相好簡單,之後都多數無之後。因為件事根本係上太空,但以為只係砌架手推車出來。即使介紹個人或者介紹間公司都無咩可能搞得掂。

二係佢原來真係有個網站,係好舊想更新,但老細覺得幾千蚊搞得掂,叫佢搵人搞搞佢。不過,個網站其實係盤古初開時做落,就算用 WordPress 幫佢起再搬啲野入去都唔係幾千蚊搞得掂。更何況好多時老細們又有啲好新穎又覺得好簡單嘅 IDEA 入去,等於由頭寫個個一樣。

三係佢想嘅野 online 其實有 solution,俾 monthly fee 再搵人執下就搞得掂。講完佢聽大概可以點做又介紹個 Freelance 之後就會無疾而終。因為多數「佢」都會覺得自己搞得掂,然後快則搞幾個月都搞唔掂,慢則幾年後再同你提起件事。

唉!其實石先生唔係唔幫手,唔介紹,但好多時想個個以為砌模型,但其實件事係砌架電動車出來。講真話又太串,講幫手又無能為力,介紹又好似累人浪費時間咁,真係好難做的。




【此文章刊載於石先生部落;標題:【無題】整網站 ;本篇文章為贊助內容;強制廣告:HisTrend.HK 給你不一樣的科技產品】