最近好多人講 SEO，所以今篇文都唔敢打 SEO 三個字係標題。
SEO 其實咁多年來都有好多人分享過好多方法，有白帽，有黑帽，但無論係咩帽，Google 有無改算法，有無用 A.I.，最緊要都係記得基本條件，就係 Link。
好似搭火車去旅行咁，乘客會揀邊個火車站落車 Guidebook 係一個重要元素。而 Guidebook 又點決定推薦咩讀者呢。當然係睇下個個火車站係咪大站啦！作為一個大型嘅火車站，Guidebook 無可避免都要介紹下，點都要推薦。
大型嘅火車站，好多時候係各火車線嘅中心，有好多唔同嘅火車線帶啲火車及乘客過去，愈多火車停靠，愈多乘客落車行街又好，轉車又好，都自然係一個大站。
如果你個火車站本身唔係大站咁點？唔緊要嘅，Guidebook 無理由只係推薦大站嫁麻，總會推薦其他火車站。有幾多火車線，有幾多火車，有幾多乘客落車統統都係計算嘅元素。愈多火車站同你個火車站接駁，自然就愈著數啦！
若然同你接駁嘅係大火車站，你雖然係細火車站，但乘客多自然都重要啲。反過來講，如果同你接駁嘅都係細火車站，雖然客流唔多，但都叫有接駁，相比啲無咩接駁嘅火車站當然有優勢。
反過來講，好多細火車站將火車駛去你到，雖然每個火車站帶俾你嘅乘客唔多，但小數怕長計，乘客量積下積下，咁你又變大火車站啦！到時你係 Guidebook 嘅推薦當然就更著數啦！
