上回講到唔好用放個控制器入電制牆中盒嘅智能燈傭,咁點好呢?想要解決呢個問題都唔係無問題,例如曼佳美及 Philips 都有提供更好嘅無線選擇,而石先生就揀左比較易買到嘅 Philips。

Philips 呢套野叫 Philips Hue,大部份嘅燈飾舖都有得賣,但你唔好以為入到燈飾舖啲店員可以清楚講到你知點用最好,因為多數都唔識 Sell 呢舊野,話你知有個按制可以遙控調較燈光外,無咩人講得出實用可以點玩,所以去現場睇實物都無咩用。

呢套 Philips Hue 有兩大主要部份,一個係 Control Hub,即係下圖呢個!佢係用來控制哂所有燈嘅重心,呢部野需要駁燈及插 LAN 線。無錯!係插 LAN 線,所以你想用佢一定要將佢放係 Router 旁邊,然後就永遠放係到,就係咁簡單。

主控與燈泡

第二個用嘅重點係燈泡。燈泡嘅標準係 E27,即係所謂嘅大頭。如果你想買外國嘅水貨返來用都得,但一定要留意係 E27,唔係買錯,例如你去日本好開心嘅時候,唔好買錯日本嘅 E26,唔係返到香港一樣係垃圾。

燈泡嘅用法同一個普通燈泡一樣,擰上去開燈制就會著,而呢種燈泡分兩種。一種係白光與黃光嘅基本款,另一種係包括白光與黃光嘅七彩色款。

無論你要基本款定七彩色款,兩款嘅功能都一樣,一樣可以遙控開關,調光暗,有白光與黃光,分別只係基本款唔可以變藍色,紅色、綠色等等七彩 Party 色。對石先生來講,全屋大部份嘅燈泡其實基本款就夠,因為唔係白光就黃光,唔通睡房整七彩 Party 色,整個粉紅色好似架步咁咩。

因此,石先生除左廳係七彩 Party 色外,其他全部都係基本款,咁做嘅最大原因係平,基本款平啲,七彩色款貴啲就係咁簡單。如果邊個店員 Sell 你全屋都買七彩色款,咁佢都幾有銷售壓力,因為你斷估唔會係浴室玩轉色吧!

裝好主控,裝好燈泡,你已經用得。係手機 Apps 下載番 Philips Hue 已經可以做到基本嘅開關,調節光暗,至於套裝送個個遙控器係手機面前完全係垃圾來,可以無視。

識玩一定玩感應

Philips Hue 除左主控及燈泡外,石先生覺得最需要買嘅配件係感應器。感應器細細隻好輕,入餅電,一次用大半年,好似石先生咁用 3M 魔術貼貼就得,連官方跟嘅鑽牆磁石都可以慳番,對屋企創傷最細。

以石先生嘅經驗,感應器一買最少都要買三個。一個放屋企門口,等你一入門口識得自動開燈。第二個放浴室,等你一入去識自動開燈。第三個放廚房,等你拿住啲碗碟唔駛摸燈制。

感應器除左開,也都識關。關係計時嘅,即如果幾耐無感應到移動嘅話就關,所以浴室及廚房呢啲就可以按需要調節時間,做到省電得來又方便嘅效果。

其實要玩 Philips Hue 仲有好多野玩,例如可以調較返屋企就開燈,離開屋企就關燈,也可以用語音叫佢開關燈等等,但係一開頭唔好搞咁複雜,簡簡單單用番官方嘅感應器已經好夠用,其他功能有機會再分享,或者你有時間先慢慢研究啦!

家居裝修紀錄(1)- 睇樓與揀樓
家居裝修紀錄(2)-「真.首期」俾幾多?
家居裝修紀錄(3)- 電制制面價格差一倍,走進內街很重要
家居裝修紀錄(4)- 電制單制定雙制?唔好係咪都雙制
家居裝修紀錄(5)- 牆的電制要有 USB 嗎?
家居裝修紀錄(6)- 電制圖點劃好?直接劃上去吧
家居裝修紀錄(7)- 買門?門最少都有分三種
家居裝修紀錄(8)- 門的價格不是全部,門框的價格讓你失預算
家居裝修紀錄(9)- 整門想慳錢?考慮做趟門吧
家居裝修紀錄(10)- 冷氣機個開關制擺位都好重要
家居裝修紀錄(11)- 智能燈飾?放在電制盒內的無線開關控制器不要選
家居裝修紀錄(12)- 無線燈光控制用 Philips Hue




【此文章刊載於石先生部落;標題:家居裝修紀錄(12)- 無線燈光控制用 Philips Hue ;本篇文章為贊助內容;強制廣告:HisTrend.HK 給你不一樣的科技產品】