買樓裝修紀錄】上集同大家講到門加上門框嘅價錢一啲都唔平(未讀請讀上回),而如果你唔想咁貴,其實都唔係無方法。既然門框嘅價錢係門嘅 0.5 – 1 倍,咁其實你唔要門框就得啦!

唔要門框嘅門即係咩呢?就係趟門啦!趟門因為係用路軌,關門係靠門係路軌個度滑過去,所以係安裝上唔駛門框,門嘅空位只要泥水做啱,批得平就得,所以係慳錢上面就可以慳返門框。

當然,用趟門都要考慮一啲問題,例如隔音、趟門所需嘅空間及整體設計係咪夾,唔係度度都適合用趟門。


door style

趟門、吊門,你又用邊款先?

決定用趟門,咁你又決定用邊款趟門呢?無錯!趟門都有分款式!如果你無咩特別要求,裝修佬可能會幫你揀上面呢啲美式穀倉門設計,然後掛上去,趟框及承重架外露,風格強烈。

呢種做法啱唔啱睇你自己咩風格,但喺計門尺寸及安裝上方便好多,裝修佬只要唔好計細左就得,正常無咩大問題。因為門上面嘅吊軌,佢本身同天花有一定距離,而呢個距離就係師傅嘅走盞位,加減 1-5cm 你都唔會好覺眼。師傅可以係等門到左再實際鑽上去確定,所以安裝簡單方便。


door style 2

由頂到底貼到盡先難搞

美式穀倉門受歡迎無他嘅,因為簡單,尺寸唔好計細就得,走盞位都多啲。相反好似石先生揀嘅呢隻(上圖),吊軌貼到上天花,然後到門由頭到尾一塊過由吊軌去到地下嘅就難搞好多啦!

因為吊軌本身幾高、吊片幾高、水泥地加埋磚後幾高呢啲數都要計得好準,一啲走盞位都無。計錯數,度門長左自然入唔到,度門短左吊起來上面或者下面有一大條空隙都好難睇。如果你係裝修佬,你會想裝美式穀倉門定上面呢種貼到實先好睇嘅趟門呢?


唔想用美式穀倉門,揀呢款上下貼到實嘅,一個唔覺意到門真係度錯左,短左咁點算呢?

又唔係無計嘅,將條吊軌裝番低啲,然後整個木箱包番住佢囉~再唔係其實吊軌咪又係鐵,去搵啲五金鐵片舖,整番啱長度嘅鐵片,直接貼係吊軌上面幫佢增長,等呢塊鐵片幫你遮醜囉!門計錯度錯都係差 1-3cm 左右,遮到嘅。

家居裝修紀錄
家居裝修紀錄(1)- 睇樓與揀樓
家居裝修紀錄(2)-「真.首期」俾幾多?
家居裝修紀錄(3)- 電制制面價格差一倍,走進內街很重要
家居裝修紀錄(4)- 電制單制定雙制?唔好係咪都雙制
家居裝修紀錄(5)- 牆的電制要有 USB 嗎?
家居裝修紀錄(6)- 電制圖點劃好?直接劃上去吧
家居裝修紀錄(7)- 買門?門最少都有分三種
家居裝修紀錄(8)- 門的價格不是全部,門框的價格讓你失預算
家居裝修紀錄(9)- 整門想慳錢?考慮做趟門吧





【此文章刊載於石先生部落;標題:家居裝修紀錄(9)- 整門想慳錢?考慮做趟門吧;本篇文章為贊助內容;強制廣告:HisTrend.HK 給你不一樣的科技產品】