【無題】廉航


HK Express 早輪出事又換 CEO,今日一於借題發揮再同大家講下廉航呢樣野。香港地,提起廉航,幾乎同 HK Express 劃上等號。無他嘅,香港咁多年來都無第二間本地嘅廉航,曾經嘅甘泉航空都執埋,難怪 HK Express 係香港營運左幾年,都仲有好多人唔知咩叫廉航,上到飛機無飛機餐係度嘈,都唔知話唔話佢好。

有去過歐洲跨國旅行嘅朋友應該都知道,歐洲有兩大廉航公司,RyanAir 及 EasyJet,兩間廉航航點覆蓋全歐洲,快過火車得來票價都好有競爭力。除左好似石先生呢啲窮遊學生會搭外,好多歐洲人都會把握呢啲平機票去唔同嘅地方旅行。

反觀香港,係就係可以飛好多航點,但主要都係傳統航空公司,雖然都有 Air Asia、JetStar、香草、JIN AIR 呢啲外國廉航飛來香港,但宣傳及航班時間都係就番當地人為主,香港來回時間都唔多靚,更唔好講啲人啲人唔太知有佢地嘅存在。


早幾年有間 JetStar Hong Kong 想成立,唔知做咩鬼野香港政府又唔批,搞到香港廉航市場到家都發展唔起,做極都係得一間公司,令好多人仲係拿廉航同傳統航空公司來比較,真係好錯。廉航始終係廉航,沒有飛機餐、按行李量收費、航班上座位較窄、機場逼留時間短都係佢嘅特色,將佢同傳統航空公司來比其實好唔適合。

以 HK Express 為例(得一間唔用佢為例用邊間),機隊全數都係 AirBus A320 系列,減低維修機款嘅成本,座位介乎 180 – 230 個,以短途五小時內嘅航點為主,好似香港人好鐘意去嘅日本、韓國、台灣及東南亞都係航點,特別係一啲商務客唔多嘅地方,想係香港直飛就要靠佢了。

無錯!廉航有廉航嘅缺點,服務無咁好,票價浮動厲害,但如同世界上嘅廉航一樣,好多非熱門或載客量不足嘅地方都係靠廉航串連起來。如果無呢啲廉航嘅存在,有啲地方好似花蓮、熊本呢啲地方,以前邊會有得直航呀!


唔鐘意廉航嘅服務係一回事,想佢改進好合理,但如果就咁否定左廉航存在嘅價值就唔係太適合,始終廉航嘅低成本運作可以補足到傳統航空公司係航點上不足。香港如果再多幾間廉航,可以飛多啲東南亞地方更好。






【此文章刊載於石先生部落;標題:【無題】廉航;本篇文章為贊助內容;強制廣告:HisTrend.HK 給你不一樣的科技產品】