上回【家居裝修紀錄】講開電制(家居裝修紀錄(5)- 牆的電制要有 USB 嗎?)有朋友係 FB 問「有無劃電制圖嘅貼士」。

畫電制圖嘅貼士,石先生都唔係專家,但可以同大家分享下自己係點標示呢啲電制,同師傅講得清清楚楚。

因為石先生個個係二手單位來,做電嘅時候都準備全部清哂,所以都無咩顧忌。即使係全新單位,就算想要番少少幅牆,但因為「做電」整暗線都係要整爛幅牆,將個電制放牆身,都係要整爛佢,所以石先生呢個咁直線嘅方法似乎都啱用。


power_switch_pic_02

石先生嘅方法係直接係想整電制嘅牆上面用紅筆劃上去。好似上圖咁,既然實地度左係呢個位要整個 13A 電制,就直頭用粗體紅筆係呢個位劃上去,寫埋到底係邊類型嘅型,要幾多 A,咁就唔會做錯啦!

與呢個做法相同嘅,如果係要 TV 頭,就係個度寫番係 TV,而如果係孖蘇,就係個度寫劃完再寫埋孖蘇,真係清楚到爆炸。

至於舊個啲邊啲留,邊啲唔要就可以好似下圖咁,係唔要個啲到打番個 X 以茲識別,咁就唔會錯!(咁都錯嘅話真係好灰囉!)


power_switch_pic_01

還有更多細節

石先生呢種劃法適合一啲全部打甩哂佢,完全剷走哂舊個啲再重新做嘅情況。如果你有啲想留,有啲想改嘅話,咁你就要寫得更仔細先得。

如果你只係想「改位」,唔係要重新拉過,咁你一樣劃出來,但就寫番唔要邊個,移條線去改正個位,然後係改正個個位劃番個款式。例如,你想將電制改高啲,唔想小朋友掂到,咁你就劃返高佢,然後加埋條線指示師傅入面條走線管道點搞。


single and double

根據今次經驗,除左求先嘅「TV」、「13A單」、「13A 孖」、「改位」外,仲有「15A 單/孖」、「20A單」、「廢除塞泥沙」、「上網」、「肚臍線」、「燈」、「冷氣」等好多種唔同寫法。最主要都係你同師傅睇得明。

連暗喉位置都劃埋出來

因為「做電」會有暗喉,如果你連暗喉嘅位都想確定埋,方便第時避開啲櫃之類嘅話,你都可以劃埋條暗喉嘅走法出來,但記住劃呢啲指示嘅時候,一定要係清走哂原裝之後,電工師傅又真係正式開工前劃。如果唔係你劃左係啲要清走嘅野上面就無鬼用了。


家居裝修紀錄
家居裝修紀錄(1)- 睇樓與揀樓
家居裝修紀錄(2)-「真.首期」俾幾多?
家居裝修紀錄(3)- 電制制面價格差一倍,走進內街很重要
家居裝修紀錄(4)- 電制單制定雙制?唔好係咪都雙制
家居裝修紀錄(5)- 牆的電制要有 USB 嗎?
家居裝修紀錄(6)- 電制圖點劃好?直接劃上去吧
家居裝修紀錄(7)- 買門?門最少都有分三種




【此文章刊載於石先生部落;標題:家居裝修紀錄(6)- 電制圖點劃好?直接劃上去吧;本篇文章為贊助內容;強制廣告:HisTrend.HK 給你不一樣的科技產品】