Synology DiskStation DS216+II 使用情況(1)- Photo Station + DS Photo


大大話話都用左 Synology DiskStation DS216+II 兩個幾月,借打風呢個假期同大家分享下呢輪嘅使用情況,講下用呢台 Synology NAS 可以做啲咩!

事實上,石先生仲未有時間慢慢去研究 Synology 呢台 NAS 嘅全部功能,但有幾個好簡單嘅功能一開機就裝左用到依家都覺得唔錯!值得同大家分享下。

Synology DiskStation DS216+II 硬體上嘅野唔同大家講太多,因為呢隻行兩個 HDD 嘅 NAS 做法上都係放兩隻 HDD 入去,然後插電插 LAN 入去就行得,無咩特別好講。


 

Synology-DS216

使用上,石先生裝嘅第一個 Apps 係 Photo Station。Photo Station 本身有兩部份。第一係佢會係 Web 介面上,加左一個 Photo UI,等你可以用 Folder 嘅形式望哂自已嘅相,以呢個做法同一般我地常見嘅 Cloud Photo UI 好似 Google Photo 相似,不過今次啲相唔係放係人地嘅 Cloud Server 到,係放係自己嘅 Cloud Server 入面。

你可能會問咁有咩咁特別。無錯!如果你只係當佢一個普通 BackUp Station 咁用真係無特別,但呢個 Photo Station 重要嘅係在於佢有一個叫「DS Photo」嘅手機 App,當你裝埋落手機之後先真正發揮佢嘅優點。

係手機 App「DS Photo」入面,你可以見到有一個 Photo Backup 嘅選項,按入去你可以將啲相經 4G 或者 Wi-Fi 傳上去 NAS,可以選擇只上傳相或者連 Video 都一齊上傳。


synology photo mobile backup

拉到落去下面,你可以見到一個選項叫「Auto-delete after upload」,呢個選項睇落無咩特別,但其實好關鍵。好多人成日話手機唔夠位,其實就係影影埋埋好多相然後又唔 Delete 佢,成日話第時有用,結果搞到手機無哂啲儲存空間。

當你揀左「Upload on Wi-Fi only」,然後再揀埋「Auto-delete after upload」及將「Auto Delete Time」揀「Periodically」後,其實你部手機用起上來就好安全。因為佢會係你每晚返到屋企之後,將啲相上傳去 NAS 保存留低,然後再自動刪除你手機相簿入面影左嘅相,幫你閒位。

點解咁特別要係呢個 Setting 唔係揀埋 4G 呢?因為如果你揀 4G,一來會用左你嘅 Data,二來如果你影完張相又想 Share 或 send 俾朋友,但你又將「Auto Delete Time」揀左「Immediately」,咁你影完張相無耐,張相就上傳然後刪除,咁你就無相可用。


phoo_mobile

所以揀 Wi-Fi Only 及 Periodically 對日常使用嘅影響細之餘,也都可以幫手機慳返好多位。石先生建議 Synology 其實係「Auto Delete Time」入面可以加多兩個選項,「A Week After」或者「A Month After」咁都可以令使用起來更方便,也可以令使用者係不知不覺下更慳手機嘅空間。

除此之外,石先生仲有另一個獨特用法。因為本身成日轉手機,所以每次用 Photo BackUp 功能時會專登為個部手機開一個 Album,好似 Vivo X9 開一個、OnePlus 5、HTC U11、ASUS Zenfone AR 各有一個,咁係搵返啲相出來嘅時候就方便好多。

如果你屋企人成日都話手機唔夠位嘅話,一樣可以用呢個方法幫佢將啲相儲哂入去,咁就唔駛煩,最起碼用左呢個方法,有咩事佢話電話壞左都可以拿番啲相。


synology photo mobile

寫下寫下又咁大段,睇怕都要做一個系列,Synology NAS 第二個功能下篇再講,晚安。






【此文章刊載於石先生部落;標題:Synology DiskStation DS216+II 使用情況(1)- Photo Station + DS Photo;本篇文章為贊助內容;強制廣告:HisTrend.HK 給你不一樣的科技產品】