點解啲一手樓咁賣得?過程好重要


上回講到「真.首期」俾幾多?,今日應該同大家講下裝修,但石先生借題發揮,同大家講下點解依家啲一手樓咁賣得。

唔駛講咩外圍因素,唔駛講咩政府辣招令二手樓減少供應,只要睇番一樣野,就係買二手樓及發展商一手樓嘅分別。

首先,第一回「睇樓與揀樓」講過,睇二手樓由睇區,到睇大廈到睇單位,每一個項目都好費時費神。睇二手樓,睇中個區,揀中大廈又未必有啱嘅單位。


睇一手樓呢?睇啱左區,個幾個月都只會得一個盤俾你揀,唔會有競爭比較。棟樓新嘅,二手樓個啲殘舊,就算俾你落地盤統統睇唔到,更何況係睇個示範單位。而且睇中個區,發展商實話你知佢個度有幾好,地點幾好,幾近幾方便,同你二手樓要自己度過行過完全兩回事。

睇一手樓,睇啱個盤,揀啱一房、兩房定三房,你已經可以入紙等俾錢。買唔到?你估你真係炒家買唔到咩!首次置業客真心要買,係售樓處門口排隊個個經紀撲都撲俾你啦!

搵二手樓?唔好意思!你揀中個區,再揀中大廈,但可能無你想要嘅大細或房型。唔啱?等下先?等到幾時?一手樓話你知短則一星期,慢則一個月。二手樓?Who Knows。


cedrus - washroom

old house

好啦!二手樓俾你揀到啱嘅區,啱嘅大廈,啱嘅單位,入去現有業主個單位一望。OMG!原來佢仲住緊之餘,仲要整到間屋鬼死咁核突,房可能又亂七八槽,真係行入去都唔開胃,即刻咩睇樓意慾都無哂!明明啱都變唔啱。

睇一手樓?發展商裝修到靚一靚,行入去以為自己間屋第時都係咁。就算發展商俾清水樓你睇,一樣係打哂燈,陽光充足,乾乾淨淨,同你睇個間殘舊二手樓比較,講得掂你未來老婆二手樓好啲,你都應該好好口才。

第二個因素好簡單,就係上回講到嘅「真.首期」。買一橦二手樓,當你 500 萬做八成按揭,最起碼你都要俾 20% 出來,即係  100 萬。如果橦樓太舊,銀行估唔足價之類,你或者仲要俾多幾十萬出來。


不過買一手樓唔同,銀行係現場有人同你估價,發展商出幾多,銀行都實估得足,然後幫你計埋數。經紀幫你計發展商面價後仲有幾多優惠,扣下即日優惠,本週優惠,入會優惠,首次置業優惠,夾夾埋有成 5-11%,最少都打個  95 折,分分鐘打個  9 折俾你。當你一樣買 500 萬樓,9 折即係 450 萬,計落差幾遠呀!

經紀再同你用呢個 9 折價幫你借錢,銀行借  6 成,按揭公司借  1 成,發展商自己再低息借多 1 成俾你砌夠  8 成,一計條數明明買二手樓要俾成 100 萬,依家只係要拿 90 萬出來,仲要總數只係俾 450 萬,但有一橦價值 500 萬嘅樓,點會唔吸引。

更何況,買二手樓唔包裝修,仲要無會所,睇樓過程係條街到行來行去,大汗疊細汗,但睇一手樓坐定定有冷氣有水飲,有人服侍,第時又有個好鬼靚嘅會所,仲要包埋裝修,你話點解啲人唔去買一手樓?


一手樓細啲?係個一刻你覺得有好大影響咩?大啲細啲係一個好難量化嘅概念,但當下嘅環境、金錢都係理性嘅指標,你明未?如果你未來老婆咁明事理,知啲會所其實要俾管理費,睇個個示範單位唔係第時間屋個樣,願意放棄新樓揀舊樓,你真係要還神請佢去旅行。

一手樓好賣,未計啲咩供需關係,單係呢兩點已經話到俾你知相差幾遠。以上呢啲情況係咪萬試萬靈?你問下身邊朋友囉!

下回【買樓裝修紀錄】同大家進入考驗頭腦及精神嘅裝修階段。





【此文章刊載於石先生部落;標題:點解啲一手樓咁賣得?過程好重要;本篇文章為贊助內容;強制廣告:HisTrend.HK 給你不一樣的科技產品】