買樓裝修紀錄(1)- 睇樓與揀樓


人年紀大,做嘅野又唔同啲,所以今個系列【買樓裝修紀錄】就係要紀錄由買樓到裝修嘅每一步,因為呢件事真係比想像中複雜,完全係比想像中麻煩得多。

首先,買樓前要計下自己有幾多錢,計左再睇樓,睇樓後又要揀樓,揀好樓仲要落決定。如果你睇樓又唔揀到樓,咁你就要再睇,然後不停睇樓、睇樓再睇樓,直到你揀好樓為止。

石先生本身坐係 Coffee Shop 幻想嘅時候,好想要會所,要 10 年內樓齡,仲要近地鐵站,更要係九龍,但一去睇樓發覺原來無可能。以上嘅條件全部都唔成立,要由頭想過。


ocean wings

話說舊年年中行過啲新盤銷售門口,俾個經紀帶入去睇下啲將軍澳新盤,點知一睇個兩房單位實用 400 呎夾埋要成 700 萬,做八成按揭,拿兩成首期出來,都要 140 萬,真係俾唔起,所以…

好快就已經要面對現實,要知道新樓不是我買的。要放棄會所、放棄 10 年樓齡先有可能滿足九龍及近地鐵站呢兩個比較重要嘅目標。

石先生都算幾好彩,因為調整完目標後,搵下地產舖剛好有個啱心水嘅,所以逗留係睇樓階段嘅時間比較短。因為心水剛好近地鐵站,環境又唔錯,地區幾好,也都有想要嘅兩房。雖然楝樓樓齡仲大過我,但剛剛做完大維修,都算幾好彩。


因為大維修一戶起碼都夾幾十萬,加埋換電梯一部又要幾十萬,每戶攤分最少都要近 50 – 100 萬,所以剛剛做完大維修嘅舊樓都好重要下。

其實睇樓過程都好密同睇左好多,有啲太舊,有啲樓下係食肆,有啲又住近人睇唔真,所以幾個來回啱啱睇到依家呢間都好快,由睇樓到落訂俾錢前後不足 7 日,真係大概睇啱就買,無幾多思考時間,仲兒戲過買棵菜。

下回【買樓裝修紀錄】再同大家分享「真.首期」呢回事。






【此文章刊載於石先生部落;標題:買樓裝修紀錄(1)- 睇樓與揀樓;本篇文章為贊助內容;強制廣告:HisTrend.HK 給你不一樣的科技產品】