人生都要經驗值除左勤力練功,仲可以行下問多啲人嘅


人生就同打機一樣,每個人一開始都係由 Level 0 一層層咁打上去,不論你有錢定無錢其實都有段必經之路,幼稚園、小學、中學,然後去到第一個人生路口,專上學院。

打機有經驗值,人生都有經驗值,但打機嘅經驗值用來判斷過關打對手,而人生嘅經驗值就係用來俾你係呢啲人生路口上面揀一個啱嘅方向。就咁聽落未必明人生經驗值有咩用,但其實人生經驗值就同我地去食飯一樣,食過真材實料嘅雲吞麵先知十蚊雲吞麵差係邊,食過真正意大利 Pizza 先知 Pizza Hut 個啲其實只能夠填飽個肚,而人生也都一樣,你要經歷過一啲野先會明白。

離開中學呢條路,其中一個最難揀嘅係方向、夢想。香港人由細到大咩事都有父母幫你揀,學咩興趣班,讀邊間學校,目標係要考試高分,身邊都有人話你知,但其實你真真正正有咩方向,有咩夢想,你有無真正想過。未想過唔知唔緊要,由今日開始想,由今日開始去發挖,總會搵到一條啱你嘅路。


150415031093_TP_V

唔明?唔知講咩?講明啲~ 人生就好似中學生拍拖,中學一齊返學,一齊放學,拍拖當然好開心,但當你地離開中學,各自去唔同嘅專上學院升學,一個係九龍城,一個係香港島嘅時候,你地嘅愛情係咁仲咁牢固呢?其實大家男女朋友之間嘅係愛情定係好好友誼嘅異性朋友呢?仲一齊返緊學未必感受到,但真係一個東一個西嘅時候,你自然明白。

食野唔夠經驗值可以食多幾餐,愛情唔夠經驗值,可以拍多幾次拖補救,但人生唔夠經驗值就唔可以用人生補救,因為人生有限,無得 Take 2,所以有啲野唯有多聽多問,拿多啲資料來補充自己經驗值不足呢個缺點。

依家係灣仔會展舉行緊嘅「教育及職業博覽 2017」就係其中一個機會,聽落好悶,無咩方向,但其實成件事好人生。離開中學可以點,有咩選擇,呢類型嘅博覽其實好幫到手。一幅簡單嘅升學圖已經話俾你知有咩正路嘅選擇。


HKTDC_Eductaion_Exhi_03

望住幅圖,成績好讀大學,成績唔好讀文憑,有專長去讀專科,唔想留係香港讀可以揀去日本、法國、美國、英國,有錢嘅好似讀咩都係一條出路。

不過石先生建議大家,行「教育及職業博覽 2017」想搵教育資料唔好行「教育」個邊住,應該行左「職業」個邊先,因為係你人生第一個路口,你唔應該咁短視,只係想應乎眼前呢個難關,應該望遠啲,望下第二路路口「返工」時,你大概想做咩。

行去「職業」個邊,睇清楚唔同工作做咩,好似人人都做得嘅保險,其實做啲咩嫁呢?似乎薪高糧準嘅政府工其實有咩要求,做左有無得升職呢?一啲低技術啲嘅工作人工又好唔好,又有無得升職呢?


HKTDC_Eductaion_Exhi_12

HKTDC_Eductaion_Exhi_01

「職業」有好多種,邊種啱你,邊種唔啱你,平時望係唔會留意到,難得有真人俾你問,唔可以走左去,當然要咩都問下,唔好只係搵啲高大威猛影相呃 Like,因為人生係你自已嘅。

行完「職業」,有無方向都好,你再行「教育」自然就會將一啲唔啱自已嘅剔走,唔會揀錯路口,目標更加清晰,唔會被一時熱潮蒙蔽。因為「職業」唔係睇一時,係睇長遠,係睇晉升途徑,睇長遠。大部份嘅人揀左入一行,就會一路係個一行入面,好少跳番出來,所以「教育及職業博覽 2017」先睇職業再睇教育係一個好方法。

例如呢個訓練飛機師嘅課程,俾錢學做飛機師仲幫你拿埋牌聽落好吸引,但最基本要學兩年,你有無咁嘅興趣呢?而你本身又有無咁嘅能力去學,學院做飛機師係咪你鐘意呢?你會唔會願意去外地學揸飛機,當中要同家人朋友分離一段時間接唔接受到?呢啲問題你嘅老師朋友唔會答到你,但現場有經驗嘅人就可以話你知。


HKTDC_Eductaion_Exhi_04

比較特別嘅當然係現場會有一啲奇怪嘅職業分享,例如平時好日都唔會聽到一次嘅海運業,即係電視劇入面都唔再提嘅行船。出海咁耐無到幾多錢,有咩前途,有咩要知,平時唔會聽到。對海運業無興趣聽下都係一件好事,因為未聽過嘅就係無經驗值,聽完就拿左少少經驗,總比咩都無好。

又例如依家結婚人士潮興嘅 Wedding Planner,其實一樣有得讀,一樣有得學,但你會唔會想讀呢?讀左其實有無得升返大學呢?唔問唔知原來台灣有呢科讀,或者讀完一樣可以升返傳統嘅 Hotel Management。雖然唔係一個值得推薦俾大家嘅學科,但知道總比不知道好。

一時三刻唔知有無用都好,人生雖然經驗,做決定前都需要經驗,用半日時間行一行呢個「教育及職業博覽」,幫自己儲番啲經驗值,準備未來打大佬啦!

教育及職業博覽 2017
地點:灣仔會展
日期:2月23至26日 (星期四至日)

HKTDC_Eductaion_Exhi_08HKTDC_Eductaion_Exhi_10HKTDC_Eductaion_Exhi_11


EVERSWEET 智能寵物飲水機 - 活水更健康
https://anlander.com/





【此文章刊載於石先生部落;標題:人生都要經驗值除左勤力練功,仲可以行下問多啲人嘅;本篇文章為贊助內容;強制廣告:HisTrend.HK 給你不一樣的科技產品】