凡事求「好」,不求「完美」

Browse By

ADS

講起寫文,石先生真係好耐無寫過,呢輪雖然都有出文,但都係啲一早寫開嘅文,同真真正正嘅寫文都有啲差別。不過咁講,呢篇都唔係平時寫開嘅文,算係抒發下,哈哈!

其實呢輪要做嘅野其實唔算好難,但好需要用時間,將一個 Web Site 由頭改落尾會唔會好難呢?話難唔難,話易唔易,睇你想要做到邊個位。細細個好多人同你講做野要求「力求完美」,但其實人大左你就發覺好多野根本唔可以「力求完美」,因為一旦「力求完美」嘅話你根本咩都做唔到,也都無可能完成。

唔「力求完美」咁點好呢?其實都唔係無辦法,辦法就係求「好」。「好」及「完美」係兩條唔同嘅線,一條係可以接受,一條係無任何缺點。要求「好」唔難,但要求「完美」就好難,特別係係有限時間之下要選擇嘅話,其實就更應該選擇求「好」,因為咁先係切實可行之法。

當然,做一個 Web Site 有唔同嘅野要做,邊啲重要,邊啲無咁重要,好多時候做錯一樣就會差好遠。有咩問題一定要解決,有咩唔需要咁緊張,其實都睇有幾多經驗,用過幾多系統,對成件事有幾多掌握。

例如做圖及 SEO 兩者到底有幾重要?有邊樣一定要做到,邊樣唔一定要做到,其實好難衡量,因為兩樣野都會影響讀者,但邊樣重要啲,邊樣無咁重要其實好睇你自己嘅決定及經驗。

花左成個星期做圖,似乎無咩回報,但其實係咪一定無回報呢?都唔一定,因為好多事嘅關鍵位就係細節,細節做得好唔好決定左往後更長時間嘅成果。情況就同 SEO 一樣,唔做唔會感受到,但做左就一定感受到差別,所以 SEO 要做到邊個程度,圖要靚到點,Social Media 又應該點做,花幾多心思時間都係一件要好好衡量嘅事。

講左咁耐你其實明幾多呢?好難講,因為始終唔知石先生講緊邊件事,你也唔係個個位其實好難理解。講白啲嘅話就係 HisTrend 準備要搬平台,由本來嘅 Shopline 轉去 Shopify,係呢個過程中要做嘅野除左上落貨外,其實仲有好多。

不單要了解 Shopify 呢個平台本身有啲咩,無啲咩,更加要去想方法將佢無嘅野補齊,光係呢樣野就已經夠煩。點煩法?好簡單,Web Site 語法裡有樣野叫 <meta keywords>,佢嘅作用就好似關鍵字咁,話俾其他網站知到底呢篇文、呢一頁網站到底有咩。係 WordPress 嘅世界,文章裡輸入嘅 Tags 就等於 <meta keywords>,但係 Shopify 呢個世界,兩件事就完全無關。

Shopify 入面嘅 Tags 只係幫助佢 Search 用,同 <meta keywords> 扯唔上半點關係,而 Shopify 本身也都無 <meta keywords 呢樣野,所以要做到就要靠自己解決,要修改程式碼,要係 Shopify 上加建,要搵程式員幫手。呢件事有幾重要呢?好似重要又好似唔重要,可以帶來幾多影響?幾多收入?值得俾幾多錢去搞掂佢?完全無咩參考嘅價值,但石先生嘅決定就係要快啲搞掂佢。

另一個情況就好似同事回報版面有問題,有個位置會有缺陷,某張圖會唔係個個位顯示,呢樣野又有幾重要呢?係同事眼中算好重要,但係石先生嘅判斷入面就未算不解決不行之事。因為顧客入到來最主要都係睇產品、睇價錢、睇功能,某個位無左張圖會有影響,但相對更重要嘅搵客入來呢點又無咁重要啦!所以排序去到幾時?要排序,但人手有限暫時可以排後啲。




【此文章刊載於石先生部落;標題:凡事求「好」,不求「完美」;本篇文章為贊助內容;強制廣告:HisTrend.HK 給你不一樣的科技產品】