搞網站,應該好易姐?你真係咁認為?

近年唔少新網站成立,傳統媒體又轉型做網站,網站真係多得厲害。望住一堆新網站,石先生又回想起好多年前入行做記者,同一位行家嘅對話。

係個個時候,網站唔多,與傳統媒體比較仍然係小眾,係好多人眼中都只係覺得「開個網站就當自已係記者」嘅階段。當然,「開個網站就當自已係記者」呢個想法仍然存在,但其實要做到一個網站有人睇,你估真係覺得咁易咩?

做過嘅人都知難,但未做過嘅人通常都覺得好簡單,覺得開左個網站就自然有人黎,然後做落左就有廣告,只要突破開網站呢關就解決問題。

stoneip

流量來源

天真?好多人真心咁諗,以為開左個網站就掂,一切問題迎以解,但其實網站開張個刻先係真正嘅開始。

先唔好講其他,第一個煩惱係點可以令人知道你網站。靠 Facebook?得,但你不論開個 Page、自已或朋友 Share 始終都係個個小圈子,出唔到去,俾你有 5,000 朋友,朋友也有 5,000 朋友,雙方都係 100% 傳播率(根本無可能咁高),你最勁都係 10,000 人睇到,但睇到唔代表會 Click、唔代表會 Like、Comment & Share。

wemarriedasajob

Facebook 傳播唔掂,幫唔到你帶人流入來,咁你有咩方法?你有啲咩招數?聽人講 Boost Post。好,Boost Post 係有效,但你有幾多錢可以 Boost Post,可以 Boost 幾耐?

無錢 Boost 靠 Google Search 囉!咁你知唔知點樣令 Google Search 到你網站?點樣可以一擊即中?點樣最有效?唔識?又要上堂學,學野要交學費,交完學費後你又係咪識?識又有無方法或有無錢做呢?呢啲通通都係問題,每個範疇都有排你學。

無錢呀,唔用 Facebook,唔用 Google,仲有無方法呀?有,有其他方法,但你識唔識?有無人問?問又係咪有人教你?真係有人俾你問,你都係榨取緊嘅佢價值,你榨取得幾耐?最後咪又係要靠自已。

內容定位

解決左第一個問題,有人來你網站啦!咁你又有咩俾人睇呢?提供左啲咩俾對方呢?有無咩價值呢?搞笑,無錯,搞笑都係一種價值,如果你能夠持續咁搞笑就無問題。

不過如果你個網站無價值提供到俾人,咁人地會唔會睇呢?睇完又會唔會再返來呢?你嘅內容同人地嘅內容有無咩分別呢?人地又寫海洋公園,你又寫海洋公園,咁你覺得啲人會去你到睇定係去大集團到睇呢?

同食肆一樣,你啲野食好食當然會返來,但如果你煮嘅野唔係好突出,同連鎖店差不多,咁顧客會去連鎖店定係你問舖頭仔呢?

ishihara-satomi

點搵錢先

做好網站宣傳點,做好內容,咁你又點搵錢呢?你係咪有能力可以吸引到廣告商呢?用 Google Adsense,你有無能夠跑到流量呢?用廣告公司,你覺得你對於廣告公司來講有咩吸引力呢?你又明唔明廣告公司需要嘅係咩呢?廣告公司面對嘅情況又係咩呢?

做網站好多時睇落真係好簡單,簡單到直到驚人,最平一年幾百蚊就有,但背後嘅野比你想像中複雜好多,並唔係咁簡單就搞得掂。

「石先生,咁即係點呀?」

即係點?明嘅明,明嘅大概知石先生講緊咩,明啲唔明啲嘅應該都會有啲位可以思考下,完全唔明嘅睇來你都係唔好開網站。有無咩可以指教下?學結衣BB話,反對價值榨取。哈哈!





【此文章刊載於石先生部落;標題:搞網站,應該好易姐?你真係咁認為?;本篇文章為贊助內容;強制廣告:HisTrend.HK 給你不一樣的科技產品】