你想跌市「執平貨」,業主何嘗唔想「待價而沽」


買樓對於外國人來講係一件毫不容易嘅事,對香港人一樣係。因為香港除左樓價高外,好多人買樓都會當投資嘅一部份,令樓除位地段、大細、位置外仲要睇租值及升值潛力。

任何有投資成分嘅野,買嘅人都想「低買高賣」,所以買樓嘅時候唔止會睇楝樓,仲會睇好多技術分析,例如幾時「供樓利息」、「供應量」、「加息週期」及「政府辣招」等等。

睇呢啲咁嘅技術分析當然好,望下不同財金人士嘅評論也都有啲幫助,但其實大家睇到嘅報紙寫手、雜誌專欄、財經專家、金管局高層定世界首富,無人係預言家,能夠準確話俾你知跟住樓價升定跌。樓價升跌嘅因素始終好多,「低買高賣」都係靠運氣多過靠估。


any-hong-kong-photo-6

既然係咁,買樓應該點呢?

買樓當然唔好問石先生,因為石先生都唔係預言家,更加唔係財演,無咩專業意見俾到你,只能夠講一切決定都要自已做,因為最終承擔責任嘅係你自已。

其實當你想「低買高賣」嘅時候,業主何嘗唔想「高賣低買」,所以樓價低嘅時候,一啲好嘅樓盤或單位唔會放出來,因為業主根本唔等錢駛,放係到養蚊又好租出去又好,對業主來講一樣無咩大影響,你有錢想買都無得買。調翻轉,樓價高你唔願意買嘅時候,業主反而覺得好價想放,一啲好單位就會出現係市場啦!


any-hong-kong-photo-11

咁嘅可能性有幾高呢?

大家都知香港有好多人收租維生,手中幾層樓放租過活。如果你係一位咁嘅業主,手上幾橦物業,有得自住,又有得收租過活,更唔等錢駛。點解仲要係市道唔好,樓價差嘅時候賣呢?要賣都等價好先賣啦!

大家未落場,隔住個芒睇數字當然好簡單,但真實落場又係另一回事。每區有好多大廈,大廈每隔一個路口又有唔同景,每座又有好多單位,每個單位又會有唔同裝條間隔,同你隔住個芒睇數字根本兩回事。


當年淘大 SARS 大跌價,有報導話某單位放 30 萬。呢啲單位睇落好吸引,你心諗「撈底」仲唔係時候,但你望下銀行有幾多錢,研究下可以借到幾錢嘅時候,個單位已經俾人買左!30 萬一個單位,買番來放租一樣有得賺,手上有幾橦樓嘅專業投資者晨早搭通天地線,有啲咁筍嘅野,你估仲會落到你手?你要搵錢上車,人地一張支票即俾全數 30 萬交吉,你係個個單位業主,你會揀邊個?就算你落左訂都係咁話啦!

買樓要睇大環境,但更需要睇心理,始終同你交手嘅係人,除左業主外,仲有其他買樓人士及專業投資者。大環境氣氛、樓價升跌、息口以外,好多時「買」定「賣」都係一念之差,如其研究幾時捉到「低位」,不如搵返個好單位,或者想真啲自已係咪真係要買樓好過啦!






【此文章刊載於石先生部落;標題:你想跌市「執平貨」,業主何嘗唔想「待價而沽」;本篇文章為贊助內容;強制廣告:HisTrend.HK 給你不一樣的科技產品】