劣評嘅野… 唔同界別其實承受能力有唔同囉…


OpenRice 會否刪劣評,這事大家各有各爭論,反正平台在人地手上,人家有最終決定權,真係收錢刪食評,你都無話可說,衰啲講句「你咬佢食呀」

石先生打左字咁多年,感覺唔同界別對於劣評嘅承受能力可以差好遠,有啲界別視之如無物,有啲界別珍而重之,有啲界別見一個刪一個,恨不得撰寫劣評者落地獄。

劣評其實背後都有一個基礎,就係要有分析評論能力(唔計得粗口無內容個啲)。至於分析後是否能夠用自已嘅文筆將意見及感受表達出來,則另作別論。


科技界愛佐證

先講石先生最熟識嘅科技界。科技界算係石先生接觸過嘅界別中最能夠接受劣評的一個。具體原因到底係咩留番俾前輩慢慢分享,但石先生第一個感覺到嘅原因係科技界大多都係硬體,本身好注重數據,所以好多時候撰寫劣評者都好注重數據,用來佐證自己嘅意見。

因為劣評本身再主觀都會拿出證據來說服對方,所以好多時候主人家即使幾唔開心,見到證據都無咩好反駁,只有作出改善或者拿出另一些證據來辯解,不然再拿出一些形而上的問題與答案來回覆,混和一下大眾嘅想法。


至於太追求數據佐證導致的盲點問題不在討論範圍。

第二個原因相對於第一個來講就完全無野可以佐證,完全係感受。石先生覺得科技界本身接受左劣評呢件事,所以若劣評唔係致命,好多時候都係正面或平常心處理,反正好多劣評本身都係一種意見,與其鬧番轉頭不如望住啲劣評來改善產品。

如果撰寫劣評者本身係感受型,用打手迫多佢兩迫令佢拿出佐證可能仲大獲。所以係咁嘅環境下,科技界嘅劣評都唔算少,也都係石先生講嘅三個界別中最多嘅一個。


 

劣食評最好識煮啦

至於食界又接唔接受劣評呢?石先生個人感覺係如果劣評係關乎環境、關乎食物賣相都係比較容易接受,也都比較易得到支持。如果你嘅劣評係關於服務、食物質素、新鮮程度或者好唔好食呢啲咁主觀嘅野,通常都無咩好下場。

食係一種好主觀嘅野,特別係好唔好食,抵唔抵食更加係主觀都不得了嘅事。每個人的舌頭都唔同,人人都有自已嘅口味,有啲人鐘意濃味,有啲鐘意健康,你話自已係食神,人地當你係食X神。魚蛋到底係咪美食都可以討論一番,更何番係其他更多變化嘅食物。


因此,要寫食評除左你識煮,否則寫劣評都未必有好後果。因為你識煮嘅話,起碼都有一句「你識煮咩?紙上談兵」去反駁人地。否則人地一句彈埋來,你真係 KO 收場,即使你真係食神都一樣被人當食X神。

當然啦!識食唔代表識煮,唔識煮嘅情況下寫劣評需要勇氣,而且寫完劣評分分鐘俾啲同路人借機抽水話你唔識食,你都真係唔知反駁唔反駁好,所以劣食評唔係無,但食呢樣咁主觀嘅野,劣評好多都係同朋友講,相對少見街。

 

旅遊有唔開心野嫁咩?

如果講最少劣評大概都係旅遊界。因為旅遊對大部份人來講一定係一件開心嘅事,即使旅途中有咩唔開心,總結一定係開心(點解會咁請自已搵心理學書慢慢睇),所以旅遊界算係少劣評嘅地方,因為啲人根本就唔記得自已唔開心嘅經驗。

唔係喎!上網見到好多航空公司劣評喎!

無錯!航空公司有劣評,但其實你留意下好多都係來自 Delay 或者取消呢啲「不可反駁的事實」。至於飛機上嘅饍食、服務或者座位寛度等等都唔多劣評。

點解?飛機入面嘅野好多時候好睇經驗值。你到底搭過幾多次飛機、食過幾多餐、有幾認識航空公司,一切都係講求經驗值。呢啲野對於大部份旅客來講都一定輸(去嘅次數唔夠多),而且圍觀者本身都唔夠知識去分析,所以當主人家出來講番兩三個原則或者講下啲周邊野混淆視線,群眾好快就會倒向主人家,或者就被周邊野吸引過去,所以要旅遊劣評好少。

去旅遊一般唔會重複去同一個地方,去左個次又可能隔左好耐,季節又唔同,到底自已體驗嘅係唔係標準好多人根本唔知,連支撐自已睇法嘅材料都無又點敢投訴,所以你見啲呢投訴好少出現。

講到旅遊景點更加少之又少。如同上面講,大部份人去旅行只會記得開心嘅野,去到中左伏唔會覺得係景點問題,會覺得係自已唔啱玩、時間唔啱或者無做足功課,鬧自已多過鬧景點。

情況好似你去左荔園覺得老土唔好玩,啲人會鬧明明個度賣懷舊,你唔啱唔好去;到今年荔園回歸加左好多現代野,你覺得好正但又會有人話呢到都唔係荔園,無哂啲懷舊味一樣。

根本每個景點人人都有自已嘅解法(其實係主觀感受),有人鐘意天氣,有人鐘意平,有人鐘意歷史,有人根本唔在乎個景,人人唔同。你感受到嘅同佢唔同,佢就唔會認同你。即使認同你都唔會幫手,情況如同你被人圍嘅時候,旁觀者即使再多都只會睇住你俾人揼,唔會埋來幫你一樣,你要搵到人支持好難,唔好講要證明自已嘅睇法。係咁嘅大環境下,寫旅遊景點劣評嘅人少之又少,始終係被人鬧同被人羨慕之間,當然揀被人羨慕啦。

係咁嘅大環境下,大家大概可以明白點解明明好多景點都好伏,但大家都唔會見到呢啲伏景點嘅劣評,因為一個景點再伏,自已去到開心就唔會覺得個到伏了,更唔講伏呢樣野某程度上代表自已 7,又係一種被人抽水嘅好機會。

 

最後,石先生同大家講一個小故事。話說石先生多年前去過一個景點覺得好無聊,除左普通到不得了的海灘外無咩好睇,返來同朋友講好伏。點知個位朋友竟然話「你真係唔識野,個個位最靚係睇日落呀!」

聽到呢到石先生真係無出聲,因為當一個景點賣點係日落嘅時候,除非佢日落真係好驚人,否則個個景點根本無特別。認問世界上有邊個位睇天色多彩漸變嘅日出或落係唔靚嫁?靚根本唔係個個景點,係日落。不過咁,人地覺得好正咪好正囉~ 話唔定人地第一次睇日落呢?

講完,多謝收看呢篇咁無聊嘅文章。






【此文章刊載於石先生部落;標題:劣評嘅野… 唔同界別其實承受能力有唔同囉…;本篇文章為贊助內容;強制廣告:HisTrend.HK 給你不一樣的科技產品】