石先生一連申請咁多張信用卡，好彩張張都有用下，都有準時找數，如果唔係啲貸記錄應該都幾得人驚。今次申請呢張係「Standard Chartered 亞洲萬里通萬事達卡」，目的好簡單，就係為左佢啲迎新。
迎新有咩特別呢？好簡單：首 HK$7,500 (HK$0.5 = 1 里)，然後 HK$2 = 1 里，上限 15,000 里。即係首三個月，簽夠 HK$37,500 就會有齊頭 30,000 里。如果同時申請埋「銀聯雙幣卡」就多 3,000 里。
這 33,000 里就係石先生申請呢張「Standard Chartered 亞洲萬里通萬事達卡」嘅原因啦！如果你搵小斯申請可以再多 2,000 里，詳細請睇小斯，佢先係專家。
事實上，呢張「Standard Chartered 亞洲萬里通萬事達卡」主力係用來儲 Asia Miles，所以以儲里數為目的嘅，可以用來當主力，因為佢儲里數嘅速度仲快過國泰自己個張「American Express（AE）國泰尊尚信用卡」。
「American Express（AE）國泰尊尚信用卡」上次講左，香港及外地簽賬都係 HK$6 = 1 里，但呢張「Standard Chartered 亞洲萬里通萬事達卡」仲好過佢，善用嘅話儲里數真係快好多。
- 海外、香港食肆、網上購物都係 HK$4 = 1 里
- 八達通自動增值、香港簽賬、分期簽賬就 HK$6 = 1 里
- 網上繳費賬單、保費：沒有里數
雖然呢張卡簽賬儲里數好快，但上次都講過，石先生自己鐘意儲錢多過儲里數，始終里數儲左要換仲要附加費及稅金，所以個人都係鐘意儲錢多啲，至於呢 33,000 里數飛到邊？都係飛日本囉！哈哈！
Asia Miles 新制下「香港<>東京」要 22,000 里，以每 $4 = 1 里計算，即係要 22,000 里 x $4 = $88,000 就得到一張「香港<>東京」機票。以依家一張「香港<>東京」機票約 $3,000 計算，即係 $88,000 回贈約 4% 。
更新於 Asia Miles 2018 年 6 月改制後
「Standard Chartered 亞洲萬里通萬事達卡」嘅其他優惠項目包括啲咩？講真唔多吸引，而且好多優惠其他卡都一樣有，用呢張卡係專心儲里數吧！
