家居裝修紀錄（10）- 冷氣機個開關制擺位都好重要

【家居裝修紀錄】講電制嘅回數分別係「3」「4」「5」「6」，但來到第 10 回都想講番電制，因為最近天氣熱，冷氣開始出動，再次見到當初裝修時冷氣的錯，特別礙眼就再同大家傾下。

作為買二手樓嘅人，其實上手都已經做好左冷氣，當中係書房呢邊嘅冷氣就做左係窗口式，而一間細房來講其實做窗口式都好夠，反正唔會成日開，係慳錢嘅情況下，做窗口式好過扮勁做分體式，搭棚又貴，機又貴，慳返啲錢養肥番個荷包好過。

上手做好左冷氣，其實無咩要搞，要揀嘅係做插蘇位定做肚臍制面。因為冷氣本身要做 15A 制位，唔可以做 13A 所以做插蘇位都唔代表你平時唔用冷氣可以轉其他野，係咁嘅情況下好多人都會揀做肚臍制面，等佢靚番少少。

肚臍制面即係上面呢隻，成條線又電工一早駁入去個電制入面，無開關制，長期就咁連接，要開關就靠冷氣機嘅制，好睇啲，唔駛開開關關。

石先生本身都係想做肚臍制面，但想深一層，上手冷氣夠新淨，會留番來用唔買新，即係話未來有機會冷氣到期要換機。如果依家做肚臍制面嘅話，未來要換冷氣也要同時換電工師傅整電線，會多一筆支出，所以都係保留用插蘇制面，方便未來更換。

由於上手本身就有冷氣及電制係到，所以無特別留意兩者嘅位置，直接裝修完插番條冷氣線先發現「出事」。出事位係邊呢？大家留意上圖冷氣機嘅電線位，係右邊出，然後一個大圈去左邊個插蘇，然後左邊插蘇位又俾冷氣低，變左條電線吊住一啲都唔靚。

其實要做得靚，方法唔難，但要一早同師傅講。首先，電制應該放番同冷氣機同一水平線，好似下圖用紙皮標示嘅位置，然後將電線收短，由冷氣機嘅左邊入，咁就好睇又方便。