家居裝修紀錄（7）- 買門？門最少都有分三種

【家居裝修紀錄】來到第 6 回，似乎仲有唔少野要寫，而今次就同大家分享「大門」呢個睇落好簡單嘅野。

講起大門，聽落唔係一件難事，只要去賣門舖揀門，然後等裝修師傅安裝就得。呢個理解其實同事實唔係差好多，但仲有啲細節可以同大家分享。

首先，門有分三種。一種係大門，呢啲門一般較厚，裝飾較豐富，行入舖頭嘅一般見到都係嘅大門就係呢種，但由於只係一般嘅大門，雖然未去到空心咁過份，但都唔可以當佢極穩陣，因為要穩陣仲有啲更穩陣嘅。

第二種係相對大門更厚實嘅防火門，防火門用途唔同，係發生火警嘅時候可以阻隔火，一般賣門嘅舖頭都有做呢種門，但款式好少。如果你問做門嘅舖頭，佢地多數都會同你講一般唔需要，希望你唔好做。

原因不外乎兩種，一係款式少啲，你能夠揀嘅會少左，你唔買嘅機會會相對高左，二來係價格會高啲，你唔買嘅機會也都高啲，但如果你係咪都要買，咁就唔駛理店員嘅說法啦。

如果你要買防火門，有幾樣好基本嘅野要留意。第一，你要嘅防火門有無話要幾厚呢？你要嘅防火時間又會係幾耐呢？30 分鐘、60 分鐘還是 90 分鐘？唔同嘅要求，唔同嘅價錢，而門舖要整嘅規格及證書都唔同，做之前一定要問清楚。

第三種門係我地好常見嘅房門，呢種門無咩特別，最特別就係薄啲同有啲係空心門，認真踢埋去可以爆。好處當然係有咩事可以整爆佢，壞處就係隔音唔好囉！所以有啲人為左隔音會連房門都做厚啲，呢樣野同門舖講就得，無咩特別。

一般來講，房間薄過大門，而大門及防火門都有一個香港標準厚度，如果你有特別需要咩厚度嘅門，你可以問清楚門舖，但大部份情況下都係佢熟過你，唔會賣啲有問題嘅俾你。

以上講嘅門都係成舊木嘅木門，如果你想特別啲，例如花園門或者有啲人鐘意係洗手間用玻璃門，咁就係另一類啦！呢啲門都算算地玻璃門，但佢又唔係完全係玻璃門，因為呢類門有啲係「木 + 玻璃」，有啲係「鋁 + 玻璃」，仲有啲係「全玻璃」，分別都有唔少。

如果你去睇門，你會發現唔係間間門舖都有賣呢啲有玻璃嘅門，因為成度門係木與門中間有啲玻璃係兩回事，所以要買呢類門真係要花唔少心機先得啦，因為除左睇門，度尺寸，你仲要睇玻璃。

好啦！講完啲基本野，【家居裝修紀錄】下集同大家講下買門嘅戲肉。