Tag: 罷收錢

巴士罷工不如罷收錢

新巴職工會早輪搞罷工,話要罷工,抗議資方賺錢但唔加人工,又話呢樣又話個樣,結果撐既人唔多,效果又做唔到,又阻住市民返工返學,真係唔掂當。 罷工,搞到乘客無得搭巴士,乘客點會支持你呢?你罷工又唔係個個撐,搞到工會好似無代表性咁,最重要係罷工又影響唔到巴士公司形象同財政,完全對公司無影響,不能再支持下去。 其實巴士司機工會工業行動最緊要得到市民支持,市民就好簡單,你有著數咪支持,無著數,又影響我,咪唔支持囉!點先支持?好簡單姐,你下次要搞工業行動,唔好罷工,影響市民生活。 調返轉頭,以市民為先,由市民投票支持唔支持,搞罷驗車資,市民搭巴士俾幾錢你唔理,你唔驗,完全由市民主導,覺得車程值幾錢就俾幾錢,睇下有無市民支持你,咁咪好囉! 呢招係咪好絶呢!巴士司機又可以照返工,巴士又可以照開,時間又唔會長左,又唔會影響班次,又唔會影響市民,市民又可以用車資來投票支持與否,幾好呀! 最重要係罷驗車資可以影響到公司財政,公司收入,管理層唔驚呀!一定驚到震啦!日日照出車,但收入減少喎!拖得一日,公司就收少一日錢,點掂呀!緊係要同你傾啦! 不過咁,罷驗車資呢招可以用一時,唔可以一直用囉!你日日罷驗車資,公司唔收幾日錢,真係好快死!而且巴士司機罷驗車資會唔會有咩問題呢?罷驗車資?發下夢、恨下就得,工會真係玩呢招,真係好大件事囉!