Tag: 債轉股

「債轉股」變身成為營業十三課

睇住財經版,近來見得最多嘅字詞叫「債轉股」,即係銀行(債主)本身借錢俾企業(債仔)嘅本金同利息收入由本來收嘅現金變成企業股票。企業借錢後無力償還唯有用股票來還,交出企業資產及控制權。 每次講親「債轉股」,好多人都好擔憂,但其實「債轉股」本身唔係新野,也無幾複雜,只係背後嘅野令人擔憂。「債轉股」最簡單理解情況就同你買樓問銀行借錢,但你後來供唔起樓還唔到錢,銀行收番你間屋來賣一樣道理,分別只係從私人樓變成一間企業。 中國允許「債轉股」本身唔係咩大問題,反正此方法全球都有,但問題在於銀行得到呢啲企業之後可以點? 有睇日劇嘅朋友都會留意到,日本企業同銀行關係千絲萬縷。銀行提供資金俾企業之餘,仲會提供發展建議或者大幅影響公司營運,而係日劇入面就經常成為領導者要面對嘅惡魔。 「債轉股」之後會點呢?銀行入主企業做大股東,按理可以同日劇入面嘅銀行一樣,指揮企業營運、架構重組,撥亂反正,執靚盤數再賣番出去或者原來無得救即時拆售套現,收得幾多得幾多。不過,事情發生係中國就唔可以用日劇嘅模式來思考。 大家睇下亞視,明明負債累累又無咩資產,無節目製作又無埋最值錢嘅牌照都仲有咁多人買,大家就知背後一定有股神秘力量左右大局。銀行如果「債轉股」,入主一間好似亞視咁嘅企業,試問銀行又係咪可以有實權架構重組或者拆售套現呢? 好彩嘅話,銀行「債轉股」之後可以炒哂啲人,令企業名存實亡,之前借出去條數當粉筆字抹左佢。唔好彩嘅,成間企業變成日劇中嘅營業部十三課,每年仲要浪費大量資金去養住佢,由壞帳變身成營運成本,真係喊都無謂。