Tag: 但

雖然我唔buy你,但我接受

雖然我覺得你好廢,教唔到人野,又成日抽啲女學生水。但係你有你的市場,我有我的睇法,或者好似『人在中環』咁話,人的看法是主觀的,我唔鐘意唔代表其他人唔鐘意,我接收你的作品及做法。但只僅至於此,對於你成日抽啲女學生水,我係唔會當睇唔到的。人在中環 ﹣清泉以前,我有好多睇唔過眼既人,覺得佢地冇料水皮肉麻,唔明佢地點解依然有市場,響社會上撈得咁掂。我又曾經覺得呢個世果有好多質素好低既產品,好睇呢d野唔起:唱歌唔好聽既歌星,文字寫得好爛既作家,球技好屎既靚仔球星等等等等。於是我覺得呢個世界上,人既水平都墮落晒,俾呢d低水平低既產品害死啦…好彩,自己仲能夠保持清高水平,唔受呢d劣質產品污染。我講埋d咁既野,係咪想打我一鑊?人既喜惡,係極度主觀既。包括小弟既喜惡,都係一樣咁主觀。例如好多人都知我鍾意鄧麗欣。小弟覺得佢靚女有氣質,我諗各位睇緊我呢篇文章既讀者朋友當中,可能唔知有幾多個人打算向我擲雞蛋,笑我Bad Taste啦下話?細個既時候,我會一廂情願覺得自己既喜惡,對社會上既好多睇法係真理黎既。對一d我覺得低俗冇品味既野,我會好鬼睇佢唔起。當然,年少既CK多少會從呢種「睇人唔起」既自傲心態當中,得到一d覺得自己有Taste有個性既滿足感。後來我做左生意佬,成為一個要向消費市場製造商品既人,我既體會就有好大既改變。要一件商品,成為暢銷既產品,負責製造既人,多少要嘗試代入受眾既角度去諗。好多我覺得好cheap好冇品味既東西,原來對好多人黎講都係有佢既價值同吸引力響度。我對一d爛人爛事唔buy,並唔係因為我高人一等,而係每個人都有唔同既背景性格同際遇,呢d千千萬萬唔同既組合,拼湊出人好多好多唔同既品味同喜惡。假如我覺得眼前呢件商品好爛,然而我就認定買呢件商品既人都係一個爛人,咁,我諗我除左係目中無人之外,仲係非常幼稚。世界一向就唔係咁單一,一件對我冇價值既野,對另一d人,可能係寶。只不過,你既性格背景過去等等東西所拼湊出黎既「你」,冇辦法亦冇能力去感受到當中既價值遮。世界上每個人對不同既事物,感受有所不同,其實正常不過,亦冇咩話高低之分既。社會上有千千萬萬會讓你覺得爛到不堪既人同事。不過,當你覺得週圍所有野都好似好爛,幾乎只剩低你同埋你身邊少數好朋友係俗世清泉既時候,都唔等如呢個社會真係墮落左既。或者,真正墮落左既,只係你心入面對週遭既包容。俗世清泉抑或係目中無人,有時,都只係一線之差。