Tag: 一分鐘

你可否在一分鐘內講清楚,你的工作內容?

尋晚終於順利完成第一屆 TIPS 創業計劃的初賽,從 48 支創業隊伍中選出 24 支晉級復賽。本來有關 TIPS 的文章應該在初賽前面撰寫,讓更多人得知參加活動但早前實在太忙,只好借今晚失眠來做個初賽後感。 先講 Opening Speech 的 Erwin,他用自已的故事來解釋「一分鐘演説」嘅重要性,而其中一個重點就係要做好準備,因為機會隨時都係你眼前,你要做好準備講清楚自已到底做咩。 無錯!任何人都可以係你伯樂,但你到底能唔能夠講清楚自已想做咩?如果你連自已想做咩都無辦法講清楚,試問你又點説服其他人? 石先生記得剛開始一腳踢做 Engadget 中文版(香港)的時候,總會有人問一個問題「咩係 Engadget?」。今時今日做 IT 都未必知咩係 Engadget,更何況 7 年前做 IT 記者入行面對各類公司與公關,解釋呢個問題近乎必然。 要一句講明 Engadget 中文版係咩並唔容易,但經過一段時間嘅解釋,石先生最後搵到一個好簡單嘅方法,能夠簡單講明對方,以免予人白撞之感。 答案係:「Engadget 本身係美國三大科技網站之一,而 Engadget 中文版就係繁體中文版本,讀者包括香港及台灣,也係香港唯一一個綜合型嘅科技網站。」講完以上呢堆野,基本上都無咩人再問落去。因為佢即使唔明,都大概知係咩一回事。 離開 Engadget,若你需要石先生今天來解釋 HisTrend.HK 是什麼也愈來愈容易,因為「HisTrend.HK 係一個專注於男士用品嘅購物網站,暫時專門售賣特色的科技產品,你係市場上搵唔到嘅科技產品,可能係我呢到搵到,例如各類型特色嘅手機、電腦配件、桌上用品等等。」 做咩都好,你又可唔可以一句講清楚你做咩?