頭痛頸痛

到底頭痛定頸痛,暫時都唔太清楚,因為痛嘅係頭,但頸拉筋會紓緩,所以一陣再睇第二次醫生就應該知點解。

點解痛?照計都應該唔會估錯,就係同你依家做緊嘅野一樣,睇電話太多,「常低頭」。呢個原因我估嘅,但應該都八九不離十,如果估錯就唔慌好野啦!

一定係對得電腦多,坐辦公室枱痛啦!咁就應該係,但又應該唔係。因為近呢16個月就肯定無日日坐係電腦枱面前,反而係離開左電腦枱。無他嘅,最開頭坐公司電腦枱時,仲係電腦芒時代,電腦芒高,人坐得直個隻,姿勢應該最正確。



然後到左 Starbucks 年代就遇到第一個問題啦!但都同低頭唔太多關係,因為個時 Starbucks 唔算多人,一個人一張枱咁坐,姿勢還可以,反而係因為個 11吋 MacBook 搞到由遠視變正常,仲有少少幾十度近視呢樣麻煩。

即使之後又變返 Office,都係用番電腦枱,但大電腦芒,插住 MacBook Pro 用,Very Good。返到屋企更加係 34吋巨芒,頭都唔駛低啦~

反而近呢 16個月,Office 少返搬去個普通位,無左大芒,無左自由椅,得閒返下去都係就咁用 MacBook Pro 個 13吋芒,條腰似乎真係彎多左,頭都低左唔少。

加上頭 12 個月,唔係餵奶就換片,電腦又低頭,手機又低頭,換片又低頭,出街就無幾可,枱頭機會真心少。近呢 4 個月仲要開始陪跑,睇來都係側性主因之一。

所以話,返工用電腦姿勢要正確係啱嘅,唔好慳錢,買番啲好野對自己都好啲。公司用埋啲 Cheap 雞 Keyboard Mouse 就唔好虐待自己,俾幾百蚊就解決到問題啦!對自己好啲。



至於陪跑點樣可以無咁傷?真係仲未諗到,唔通真係佢跑時,我就鴨仔行?


本網站文章部份內容由不同公司贊助提供,全部內容均屬個人意見及感受,並不代表任何公司之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛,本人概不負責。

此文章刊載於石先生部落 ;本篇文章包含贊助內容,當您單擊產品鏈接時,我可能會獲得奬勵。