小大意見 Cathay Pacific 疫情下可以做外賣,也可以飛香港香港線

Cathay Pacific 疫情下可以做外賣,也可以飛香港香港線

-

疫情下,好多公司都要思考下點樣去做好啲!咁啱見到朋友 K 分享一張 Cathay Pacific 嘅舊宣傳海報,一於打篇文分享下早輪同朋友吹水時想到嘅想法。始終石先生部落放左係到咁耐,好日都唔更新下,對於 SEO 來講都唔係一件好事。

首先,朋友 K 分享嘅係 Cathay Pacific 一張陳年宣傳單張,入面係講緊係啟德機場起飛,遊香港一圈嘅旅程。呢種機程以前做得,今時今日香港都應該做得,對於 Cathay Pacific 來講就更加應該做,一來為左個名,做下宣傳,二來飛呢啲機實際上唔會洗得你好多錢,因為好多錢其實國泰唔飛都一樣要洗。


無機飛唔代表唔駛出糧

國泰呢啲咁巨型嘅公司,睇數字平時睇少三個零,當然唔會諗呢啲野,但其實 Cathay Pacific 依家叫機師、空中服務員放無薪假,唔代表唔駛出糧。全面凍結可以慳嘅野除左一啲燈油火蠟,你估真係慳好多咩!更何況好多油本身都買定,或者簽駛字要買,唔用放係到儲存都要駛錢,放係到擺,蝕少少用左佢反而仲好。


香港起飛、香港降落行程

正因為呢啲原因,所以國泰同世界好多航空公司都一樣,雖然飛一隻機蝕一隻機,但可以嘅話,無論如何都飛少少航線,一來消耗少少油,二來飛一程嘅 Variable Cost 未必係你想像中咁大。

以國泰機嘅種類,係符合社交距離嘅情況下,可以安排一啲細機來做香港起飛,香港降落嘅行程。圍香港飛一圈又得,外海飛一圈又得,做一啲類似教育嘅野,再配合埋人人都係窗口位,擺到明俾大家影相,應該都坐得滿。香港人咁鐘意飛,計啱價要啲顧客用 $ 買飛又得,用一個 Premium 少少嘅 Miles 分數,俾啲客戶用 Asia Miles 換飛,燒減啲 miles 也得。

飲食服務做埋外賣啦

相比起上一段講嘅香港起飛,香港降落嘅行程,以下呢個想法更加不太合能出現係 Cathay Pacific 身上。原因好簡單,上面都講左,因為 Cathay Pacific 呢啲公司平時睇少三個零,食物呢啲最多三個零嘅生意,邊會入佢地法眼。

Cathay Pacific 嘅飛機餐,經濟艙當然唔係咩美食,但如果食頭等艙、商務艙嘅餐呢?其實唔差。係疫情期間,飛機餐係做少左好多,但而係家家戶戶都可能叫外賣嘅情況下,Cathay Pacific 頭等艙、商務艙饍食可以叫外賣返屋企食,過唔過癮?吸唔吸引?


要做到其實唔難,食物材料,包裝平時都有,外賣收錢,運送等交俾專業嘅公司去做就得。有心做嘅,搵 Deliveroo、Foodpanda、Uber Eats 傾,總有一間肯幫你解決實際運送、收錢問題。(廚房肯出餐就得)試問咁有宣傳力嘅野,邊有外賣公司會唔擺黎做?你覺得係天荒夜談?五星級酒店都可以做外賣,航空公司做外賣真係咁有難度咩?


無論係大公司,細公司,無論咩時候,都有好多野可以做。以上呢兩樣野可唔可以做呢?肯定可以做,但管理層可能覺得唔重要,專心諗清楚疫情後嘅事更重要,所以呢啲小事唔做。不過,管理層唔諗,放俾下面啲中層去做其實都可以吧!公司咁多人,咁多業務,除左飛其實仲有好多野可以做。


此文章刊載於石先生部落 ;本篇文章包含贊助內容,當您單擊產品鏈接時,我可能會獲得奬勵。

本網站文章部份內容由不同公司贊助提供,全部內容均屬個人意見及感受,並不代表任何公司之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛,本人概不負責。