科技網絡 消費產品 Jabra Elite 75t 開箱文,人本設計帶來優越舒適感

Jabra Elite 75t 開箱文,人本設計帶來優越舒適感

-

對於耳機的評測,石先生一向是抗拒的,因為石先生自問耳朵只能夠分出好聲與唔好聲,唔好聲嘅垃圾,一聽知,兩隻都好聲,但差別係少少高中低音嘅分唔出。除非去到音響展個種,直頭分到個鼓係左後方,小提琴係右前方。

所以一般來講都唔多鐘意寫耳機,除非個耳機本身好聲,及有咩特別功能好值得去寫,例如之前 BOSE 直接將個喇叭加入個眼鏡到就係其中一例,而今次呢個 Jabra Elite 75t 有新功能 Hear Through 就係第二例。


支援 Google Assistant

廢話唔多講,直接開盒睇下有啲咩野!第一樣係充電盒,行 USB-C 快充,可以幫耳機充電 28小時,而下面嘅耳機本身都可以用到 7.5小時,再下面就係充電線及另外兩款尺寸嘅耳膠,配合番唔同人嘅耳仔尺寸。


係規格上,今次呢款 Elite 75t 係規格上好厲害,除左有慳電藍牙技術 5.0,配合埋石先生手上嘅 Android 手機可以有 Google Assistant、Alexa 及 Siri,例如連按耳機右邊兩下,聽到啫一聲後講「打開 KKBOX 播歌」就識得播歌,唔駛再特登再拿個電話出來。(用實體制唔係觸控真係好重要,有啲牌子都痴線嫁!咁細隻又睇唔到仲觸控,又唔係反應好喎~)

細粒好戴夠穩陣

今次呢粒 Elite 75t 細左唔少,戴落舒服啲,唔會好似有野硬住隻耳仔咁。最最最重要係佢細隻得來夠哂穩陣。自從可免則免唔搭港鐵之後,石先生一直都係踩滑板車返工,戴住 75t 踩滑板車好穩陣,唔駛怕好似以前個啲「真.無線耳機」咁有跌出來嘅風險,呢樣真係好抵讚。

Hear Through 技術

Jabra Elite 75t 本身有 4 個咪,提供主動抗噪功能,但大家生活係城市,你都知道完全抗噪有時候都唔太適合,特別係街行行下就最好聽到旁邊嘅聲音以策安全。Elite 75t 有嘅 Hear Through 技術就可以做到呢樣野,佢將其中一個咪收到嘅聲音再直接輸出番俾你聽,令你即使戴住耳機都可以聽到外界嘅聲音。

Hear Through 技術有一樣好特別嘅野,就係你戴住佢聽周邊嘅聲音其實會聽多左。因為我地人耳配合腦袋會有排除背景聲嘅能力,一啲好常出現嘅背景聲,我地會自動排除左佢,但係 Hear Through 耳機播放出來嘅背景聲就唔會被我地腦袋排除,所以有啲你用左 Hear Through 後,有啲你平時唔覺嘅聲音都會聽到。


如果你平時都有戴住耳機,半偷聽隔離位講咩白卦嘅習慣,咁你戴住 Hear Through 耳機會更清楚,一來佢以為你聽緊歌,二來耳機會將佢嘅聲放大左少少俾你聽。


當然,Hear Through 最好嘅用途並唔係用來偷聽,而係你可以好似石先生平時踩滑板車時一樣,即使戴住耳機,也都可以聽到周邊嘅聲音,保障自己安全,但到達目的地後又唔駛將耳機除落來,可以關上 Hear Through 進行抗噪聽歌,使用上十分方便。

除左 Hear Through 外,Jabra Elite 75t 也都有貼心嘅功能,就係佢係耳機嘅左右兩邊都有一個感應器,當你除低你嘅耳機時,佢會識得自動幫你 PAUSE 音樂,等你再戴番先幫你 START 番,呢啲小功能聽落無咩特別,但當你用開突然換番啲舊耳機無左呢個功能時,就知呢啲小功能幾貼心啦!

有預算嘅,今次呢款 Jabra Elite 75t 耳機真係值得考慮,好野來!



此文章刊載於石先生部落 ;本篇文章包含贊助內容,當您單擊產品鏈接時,我可能會獲得奬勵。

本網站文章部份內容由不同公司贊助提供,全部內容均屬個人意見及感受,並不代表任何公司之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛,本人概不負責。