3 個月,係人生中時間只係一瞬間,但 2019 年裡 3 個月足以改變香港人好多睇法。

去深圳食野

2019 年 6 月前,不論你有色無色,藍色還是黃色,去深圳食野都係一種潮流,就算你自己仍然未去深圳,你身邊朋友或者係 Facebook 都一定見到朋友打卡笑逐顏開。

由最入門的海底撈,到外婆家、太二、探魚、串串鍋,一層一層,由最易接受的打邊爐,到小菜款式的杭州菜,升級至北方的酸菜魚、水煮到激辣。Weekend 返深圳食一啲香港食唔到嘅野,係年青人嘅假日活動選擇之一。


這股年青人去深圳嘅熱潮,令唔少香港人知道深圳有幾多個大商場,點搭車最方便,有咩好食,WeChat、Alipay 有幾好用,紛紛不惜一切去中國大陸銀行開戶口,就係為左可以去深圳時更方便。

各大媒體無不以深圳做題材,旅遊嘅介紹有咩好玩,必食,科技嘅教你點樣係中國大陸上網,上 Facebook、Instagram,財經嘅話你知點樣可以申請銀行戶口,到後來需求反過來推動中國銀行搞香港分行開中國大陸銀行戶口嘅服務。

熱潮之盛更由喜茶帶領反攻香港,香港連開多間分店,大排長龍。香港食肆也都開始配合呢股新風貌,開始追求那種北方的辣、北方料理才會有的油脂。


熱潮另香港人去深圳更普及,去深圳唔再與按摩、色情場所劃成等號,去深圳可以一家大細一齊去,去玩去食野。

不過 2019 年 6 月後,經歷過過關「小黑房」,查手機,被查證,疑似被拘留,呢股熱潮已經即時熄滅。你無再係 Facebook、IG 見到朋友分享去深圳笑逐顏開嘅經歷,連一度潮興嘅深圳遊嘅 YouTube 片都要轉方向,約去深圳再唔係萬人回應。

7.21 元朗

2019 年 6 月前,你未必好鍾意警察,但未至於去到憎或者驚警察的地步。即使你唔鍾意警察,你都幾肯定身邊嘅親戚大多數唔會同你一樣,佢地覺得警察無咩特別,唔會覺得警察係壞人。


你心中會明白警察就好似電影咁,同黑社會係有計傾的,但警察唔會同黑社會搭膊頭,佢地唔會係朋友,兩者係有分別的。

不過經歷 7.21 元朗黑夜,你發現警察同黑社會就算唔係朋友,都唔係你以往想像中咁視對方係敵人。反而俾你一種陳浩南係電影中同李修賢講,地上秩序與地下秩序嘅感覺。

新屋嶺

以前,你唔會知道有個地方叫新屋嶺。你就算係街見到警察最多都係覺得麻煩,怕著黑衫俾警察查身份證,問你去邊。


以往見到休班警偷野新聞,或者曾經嘅旺角警署強姦案,你或者覺得係個別事件,平平安安唔會發生係自已身上。不過係呢 3 個月,通過影像見到警察用棍狂毆市民,見到警察插竹嫁禍,傳來一單又一單的非禮式搜身,被捕者係新屋嶺出番來骨折嘅消息,或者睇住警察見到著黑衫就打到無反應後,你開始發現原來呢啲事未必係個別事件,一切想像到的都可能,警察唔再係以前睇電影或者電視劇入面咁正義,兇狠程度原來不下於「黑社會」電影入面嘅刀手。

3 個月後,你覺得原來俾警察拉唔止傳聞中搵水淋你,放你係冷氣房一晚咁簡單,係有可能俾人打到骨折,斷手斷腳或者真係會被人性騷擾,或者傳聞中咁強姦。

你發現原來警察唔再代表安全,離遠見到警察係要「搵路走」,就算係一啲上左年紀嘅叔叔嬸嬸都同你有相同睇法。一係怕俾警察亂打,二係怕唔知點解要中催激煙、胡椒槍,或者警察覺得你可疑查身份證,捜身發現有支鐳射筆,有個口罩都可能當你罪大惡極,壓低你捉你返去。

語言偽術

由 689 開始,語言偽術成為左政府嘅專業用語。由無講當無左,至你唔問姐我無話無,到依家話「暫緩」「壽終正」等於「撤回」,但 2 個月口再話你知其實又唔等於「撤回」。你發現政府講嘅野唔再可信,佢話 1+1=2,你都會要再思考係咪真。

鏡頭影住警察撲跌個學生,警察答你只係齊齊滑倒。你聽到由 6 月開始傳出解放軍,到 7 月話係邊境操練,到 8 月話要推行緊急法,但一直到 9 月都無事發生,你發現原來傳聞不再可信,唯有眼見的才再可信。

8.31 太子

8.31 前,你搭地鐵見到白衫,或者會驚一驚,驚佢好似 7.21 咁見人就打,但仍然敢搭地鐵,最多唔著黑衫,著件白衫以免出事。不過,去到 8.31 你發現唔止要驚著白衫,仲要驚全新黑衫由頭包到頸嘅警察,佢地可以突然衝入人堆,不斷揮棍打,或者㩒低你係地下,壓住你條頸,向白色衫跪係到無攻擊嘅情侶射胡椒水劑。8.31 後,你發現唔著黑色衫已經唔再代表無事,係地鐵站見到警察要好似見到白衫咁,離開保障自身安全。


8.31 前,你同任何人講,話有個警察係犯眾現場入面打死人再隱藏起來,10 個人有 10 個都會當你痴線,一係唔理你,二係捉你入青山。

但係過左 8.31,你會覺得警察封站,唔俾人逗留,可能真係傳聞中咁打死左人要隱藏起來。以前你唔會信發生嘅野,依家就算唔信,都唔敢 100% 同人大大聲講無。雖然打死人再隱藏起來唔係一件容易嘅事,但無人會再話你痴線,因為大家心底裡多少少都有啲質疑,直到有真憑實據證明無咁嘅事發生,大家先敢講 100% 無事。

這圖片反映了相信此事的香港人比例有多少。拍攝日期:9.1

9.7 聲明

9.7 政府出聲明話過去 3 個月的執法行動中並無致命個案。係 7.21 前,你會相信政府,但去到 8.31 之後,你覺得政府出呢種 9.7 嘅聲明並不能夠令你釋疑。因為過去聽得太多語言偽術,加上警察每日 4 點嘅記者會不斷用語言偽術,努力辯,你會懷疑「過去 3 個月的執法行動中並無致命個案」係咪都係有語言偽術,係咪都狡辯,你對政府嘅信任已經跌至近乎零。

以往政府實事求是,有個句講個句,講得清清楚楚,唔玩語言偽術,一件咁嘅傳聞,一句說話加上消防醫護的資料足以澄清,無咩人再懷疑,但可惜係過去六七年嘅語言偽術環境中,政府通過一句說話澄清嘅威力已經消失,要澄清一件事嘅成本變得更大。

今天,就算一直有正面形象嘅消防、醫護及 RTHK 鏗鏘集同你計數,要大眾相信 8.31 太子無死人,但都唔能夠釋除大眾疑慮。今時今日,政府要澄清一件傳聞嘅成本已經高得不得了。


要解除市民疑慮,現在只有一個方法,唯有將 8.31 太子站及牽涉的旺角站、油麻地站、深水埗站、長沙灣站及荔枝角站,由開站至收站的所有 CCTV 半秒不漏全面公開,等大眾親自睇清每一秒先可以釋除公眾疑慮。否則 8.31 太子站死人將繼續成為香港人所共知的都市傳說。

9.8 太子站 Exit B 外致祭的花束在前一晚被不知名人士清走後,再次被市民插滿花束的情況。

法律

3 個月前,你係街俾人打,你會覺得有鏡頭影到,有報警,打你嘅人最終都可以被法律制裁。

今日,你見到立場姐姐作為記者拿住鏡頭拍攝被白衫人打後超過一個月,打人者仍然未被控告,你開始對法律係咪可以保障你產生疑心。以前你被人打,你就算夠打都未必會打番佢,但依家你被人打,你可能二話不說即刻打番佢,唔會再等警察處理或者法律制裁佢。因為你覺得今日被人打左左面,唔係好似耶蘇咁大愛俾人打埋右面,係要直接打番佢還擊先可以保障自身安全。

BNO

2014 年,有人叫你將本 BNO 續期保平安,你會話好,但日日都話無時間,唔切實執行,對於要俾千幾蚊未必好願意。


不過 2019 年 6 月後,你發現唔可以再拖,既然自己可以有本過期的 BNO,要快啲去續期,千幾蚊雖然可以買機票去旅行,但唔會再唔捨得,因為你已經視佢為最後嘅保命符。

 

3 個月可以改變嘅野原來好多,接下來可以改變嘅野或者仲多,而且仲未見到出路。


AE 鋼卡優惠:http://u.stoneip.info/aepcardoffer
AE 鋼卡申請法:http://u.stoneip.info/aepcardapply

AE 積分計算機:https://u.stoneip.info/aepointcal
AE 積分兌換法:http://u.stoneip.info/aepoint

AE 國泰卡優惠:http://u.stoneip.info/aecathayoffer
AE 國泰卡申請:http://u.stoneip.info/aecathayapply


【此文章刊載於石先生部落;標題:3 個月的轉變 ;本篇文章為贊助內容;