旅行,接觸到的人才是最重要

去旅行好多時候都有特別經歷,話說石先生當年第二次去倫敦旅行嘅時候,係入住朋友 R 係倫敦留學時同朋友合租嘅屋。因為朋友 R 當時已提早回港嘅關係,所以倫敦個間屬於佢自已嘅房就咁扔空左,令石先生去倫敦時有個特別容身之所。

去到倫敦,打開朋友 R 屋企度門發現成件事同本身預計嘅有啲出入。因為朋友 R 本身話屋入面只係得朋友 F,但原來朋友 F 咁啱又有朋友 A 落左倫敦,所以朋友 A 就住左朋友 R 個間吉房,石先生就只能夠訓客廳啦!

其實訓客廳定訓客房分別唔大,因為明明係一個人去嘅倫敦旅程變左有新朋友 A 一齊玩倫敦,唔只得自已一個,令到成件事好玩左。係呢幾日嘅倫敦之旅,石先生去嘅地方同旅行完全唔同,除左去超市買野食返屋企焗燒雞外,也都會去附近球場同啲英國人一齊踢波,買杯啤酒周街飲,遇著 Tube 臨時停駛跑去另一個月台轉車,夜左搭唔到地鐵轉去搭通宵巴十,或直接留係屋企好似宅男咁打足球遊戲,相比參加遊學團扮去讀書,呢幾日嘅訓客廳之旅更似住係倫敦。


雖然感受到嘅同真實住係倫敦始終會有一定分別,但去旅行好多時候景點並唔係最重要,反而係當中接觸到嘅人先係重中之重。


本網站文章部份內容由不同公司贊助提供,全部內容均屬個人意見及感受,並不代表任何公司之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛,本人概不負責。

此文章刊載於石先生部落 ;本篇文章包含贊助內容,當您單擊產品鏈接時,我可能會獲得奬勵。