石先生早輪去日本特登去 BIC CAMERA 搵手機配件就係呢件：RODE SC4 TRS to TRRS 3.5mm 手機插線。
望下價錢你就知，呢件野唔算平，就咁一條線要 1,600 日圓，約 HK$110 真係咪講笑，但呢條線又真係有佢用處。
簡單來講，外觀睇落無分別嘅 3.5mm 插位其實都有分一環、兩環及三環，一般手機係用三環嘅 TRRS，方便提供雙聲道 + 咪高峰嘅使用，而石先生本身用嘅 SONY 藍牙咪高峰 3.5mm 插頭係二環嘅 TRS，所以平時就咁將咪高峰插入去手機就唔啱用，但加左呢條線就掂哂！
講完原理，當然要實試下先知。拿起手上嘅 Nokia 8 唔得，LG V20 唔得，OnePlus 5 唔得，HUAWEI Mate 9 唔得，直到 ASUS Zenfone 4 終於都掂。
點解有啲得？有啲唔得呢？詳細原因石先生都無搵出來。到底個部手機具體嘅 3.5mm TRRS 同條線夾唔夾（TRRS 無統一標準），還是手機本身唔支援 3.5mm 轉換成咪高峰輸入都唔肯定，但唯一肯定嘅係 ASUS Zenfone 4 掂，其他邊部機得唔得仲要慢慢試。
