請人

-

做打工仔嘅時候,成日聽到啲老闆講請人好難。作為一個打工仔,當然唔會明白請人有幾難,但當你轉身成為一個小老闆嘅時候,你就會發現其實請人真係好鬼難。

石先生自從做左微企,都有同做老闆嘅朋友傾計。講起請人,大家都有同一個感受,就係請人真係好難。難在你要搵一個適合該職位嘅人其實好難。每一個求職者,對份工作一定有啲想法。唔係話工作上嘅想法,係佢到底要份工,要份糧定係要發揮所長,已經可以差好遠。


早十幾年,上一輩成日話啲後生唔努力,一代不如一代。當自己變成請人個個,唔可以話認同佢地,但完全明白佢地有呢個感受嘅原因。上一代人無得揀,有份工就博命做好佢,賺錢改善生活,但今代人唔係,唔缺工作,唔缺錢開飯。一份工,人工如何,返幾多日,有幾多日假係嘅重點,返工辛苦唔辛苦未必係重點,因為返工可能本身就係苦事,最開心莫過於星期六日。


由第一份工開始幫手請 Part-Time 到依家要請 Full-Time,面試見人見得多,慢慢都有啲想法。個求職者好勁嘅,無錯,佢真係好幫得手,但可能佢真係唔甘心留係你間細公司,希望更上一層樓,無咩新挑戰或者機會佢發揮,做唔長。教識佢基本野,剛剛開始想俾少少重要野佢嘅時候,佢已經掛牌鬆人。

請個弱弱地嘅普通人就剛好相反 ,基本野都要花好多時間。明明係 Part-Time 做啲基本野,做唔準之餘仲要個 Full-Time 花時間幫佢執漏,排左返工又會突然病再請假去旅行唔返工,有時你真係會希望佢辭職唔好再返來,但可惜你無呢啲 Part-Time,Full-Time 又無時間休息。

離開兩個極端,走番去中間都一樣有好多問題要處理。有人覺得自己好有能力,要大展拳腳,但其實只係得三腳貓功夫難擔大任;也有人能力十足但懶惰成性,只想做咀上管工,日日講原則,講就無敵,做就推哂俾人,同佢做野辛苦過自己做。

一份工作要請人做,真係好難,唔係話請就請到。佢有佢想法,你有你想法,兩者能否同步,似乎係關鍵。



此文章刊載於石先生部落 ;本篇文章包含贊助內容,當您單擊產品鏈接時,我可能會獲得奬勵。

本網站文章部份內容由不同公司贊助提供,全部內容均屬個人意見及感受,並不代表任何公司之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛,本人概不負責。