與 VIVO 這個品牌的小歷史

由第一部機跟到依家嘅 VIVO 終於來到香港。

當年 VIVO 第一部智能手機係中國推出嘅時候,石先生已經開始跟呢個牌子。第一部機出嘅時候,無咩人知 VIVO 呢個牌子,個時連中國記者都仲係叫緊佢做步步高。

佢出第一部機嘅時候石先生咁啱係北京,聽到啲中國行家講話步步高出左部智能手機,即時搵人搭 contact 聯絡搵部返來,都算係個時最進擊想要佢部機嘅記者囉!點解咁進擊?無它嘅,一來個時有睇中國綜藝節目,已經成日見到步步高啲廣告。個時步步高係主打音樂手機,仲有搵宋慧喬拍廣告,同今時今日嘅做法其實同一套路。


200907160721175478

二來個時中國手機剛剛起頭,莫講話外國記者無人理,連中國記者都唔多理,係無咩人肯理嘅情況下,梗係要搶先去留意下啲新牌子啦!第三個原因就係石先生剛剛由當年嘅菜鳥成為一個可以有更多自由意志,可以出差嘅編輯,咩都可以試可以做,好落加咁周圍搵唔同嘅公司、PR 去做採訪,就好似 Leo 咁。

其實個時搭 contact 打到俾 VIVO PR,同佢想要部機,佢都有啲呆。一來香港記者個時真識你老鼠,二來個時邊有人想要 VIVO 手機嫁,打親去俾佢嘅都係拿紅包嫁啦!你打去咁正經咁問佢想要部評測機來寫 REVIEW,又唔係要佢啲紅包,真係奇過神奇女俠。

如是者,由當年第一部機(X1)開始就跟 VIVO 呢個牌子跟到依家。因為 VIVO 之前一直都無入香港,所以聯絡都係聯絡中國個邊,而拿親嘅機都係中國版,由當初有 GMS,到後來無 GMS,刷印度版,再來到依家有港版,真係好多變化。

好多人對 VIVO 唔熟,覺得佢啲機都係中階機,唔會好得去邊,但其實咁多年來 VIVO 都有幾部機真係做得好好,只係無人知,好似 xPlay 3S、XshotxPlay5 都係好野來,只係無人知。

VIVO 出手機嘅套路咁多年來都無變過,每年年頭都會有一部真旗艦機,早年會叫 xPlay,係全年最勁同最認真做嘅機,但呢部機同常流通量好低,價格同外國一線品牌睇齊,記者要拿機都唔係咁易。


今次 VIVO 拿部 X20、X20 Plus 來香港,一時之間未必能夠令人接受,也都未必人人鐘意,但唔好睇少佢,佢地啲機有時睇落無咩特別,但有時用落先知其實好野來。


本網站文章部份內容由不同公司贊助提供,全部內容均屬個人意見及感受,並不代表任何公司之言論及立場。如需協助或希望獲得更多有關產品資訊, 請直接聯絡該品牌查詢或∕和尋求相關專業意見。如從而引起任何損失或法律糾紛,本人概不負責。

此文章刊載於石先生部落 ;本篇文章包含贊助內容,當您單擊產品鏈接時,我可能會獲得奬勵。