「記者 KOL 化」不是重點,重點係你唔好再做機械人

Browse By

ADS

依莉詩問「KOL 化是記者唯一出路?」,不論你係記者,還是 KOL,你有無諗過呢個問題呢?其實「KOL」真係重點咩?媒體入面有「KOL」真係唯一出路?媒體入面無「KOL」就唔掂?有「KOL」就一定掂?

石先生覺得唔係,我地唔應該俾「KOL」三個字蒙蔽雙眼,重點根本唔係「記者 KOL 化」,係過去咁多年媒體都叫記者要模糊自已,要做一個追求中立,無個性嘅記者,久而久之你會見到好多記者都無咩個性,只係打稿機器,無咩獨立思想,同機械人無分別。

你見到網媒有「KOL」,覺得佢好得?原因係咩?係佢講嘅野有佢嘅性格,你知佢係一個有血有肉嘅人,佢講嘅野係有思考過,會敢於用自已名來承擔後果,唔係一啲叫「迪士亞路」「香港仔黎明」嘅筆名記者寫出來,你睇住佢寫嘅野,慢慢積落信用,敢於相信佢。

NETGEAR orbi 子母機,一個訊號打通主力牆、屋企無死角。
詳情請點擊:http://netgear.anlander.com

望番咁多年嘅傳媒,你望下幾時你會留意到記者個名,記者個名好多時都會被要求模糊化處理,一係細字,一係連名都無。點解呀?一篇報導明明有名嫁喎!點解要變左無名呢?或者個名出現左都無人理呢?

一篇報導有名有姓唔係用來做 Profile,係要來承擔責任,你用得你個名寫得,你寫嘅野就代表你自已。公司叫你將啲明明唔好食嘅野寫到好好食,你有無想過呢篇文雖然出係公司個平台,但其實代表緊你自已。

唔知係咪傳媒生態嘅問題,好多時候記者要做嘅野就係等公關通知有活動,等公關安排去採訪,等公關發稿,然後寫報導出街。要一個記者自已去搵啲野返來寫好似叫佢去死咁。無錯!你無端端要去搵啲野返來好難,但係咪真係一啲野都唔自已搵返來呢?呢到講嘅搵返來唔係講上網左抄右砌,係真真正正咁出街搵野寫。

如果講依家做記者好簡單,只要上網左抄右砌,咁其實以前做記者真係會難啲,因為起碼都有聽突發,要自已去聽料,要自已去追料,依家連聽突發都無埋,得番等通知,真係連搵料嘅能力都無埋,剩係得番啲消息人士放料,叫你講啲佢想講但又唔想認嘅野俾其他人知。

要自已搵料呢樣野其實離開港聞,走入去副刊更加係難上加難。你想下,大部份嘅媒體採訪嘅吃喝玩樂活動都係被公關安排嘅,作為一個邀請嘅人,當然盡量唔好做一啲公關唔想你做嘅事啦,唔係遲下無得被邀請,或者公司被連帶影響無廣告,你又會受上司壓力,成件事幾咁吃力不討好呢?係咁嘅環境下,做記者嘅開始潛移默化知道自已應該點做,唔會做一啲吃力不討好嘅事。(點解啲人鐘意睇 YouTuber / KOL?因為好多開頭嘅時候真係有個句講個句)

有無咩實例呢?好簡單,就以人人都歌頌嘅 Apple 為例。你知唔知一個記者憑咩可以去佢係總部搞嘅發佈會?唔係佢公司有幾大,係呢位記者以前寫嘅野係咩,如果呢個記者一路以來都對蘋果好友善,一路以來都對蘋果好好,咁佢就去 Apple 發佈會嘅機會就大啦。

即使呢位記者離開左原來嘅大公司,轉左去細公司一樣唔會變,只要佢寫嘅野唔會變成對 Apple 極不友善就可以,所以你係一位記者,其實無可避免會受呢啲潛規則影響。調翻轉對蘋果不友善,或者寫左一啲蘋果唔想出現嘅野咁會點呢?

好簡單,被消失,呢個就係現實。話說 N 年前 Apple 準備係香港開旗艦店,大家都好想知入面係點,XYZ 咁啱行過見到佢裝修無關門,就咁影幾張相寫篇報導。結果呢?XYZ 由個日開始嘅所有 Apple 活動,即使係以前去開都唔再有份,不被邀請,不接受進入,不接受採訪。好彩嘅係 XYZ 一向都唔太怕 Apple,但如果你公司好怕 Apple,咁你會有咩後果?你自已思考下!

既然係咁,即係點?你仲未明?你明唔明點解網媒嘅「KOL」有叫座力?原因唔單單係 KOL 本身,係佢本身講嘅野有「信用」,學蛇叔話就係「會對自己寫嘅野多份責任感」,呢樣野係一個無名氏記者唔會有,因為你用得自已個名出來行就預左要還。你夠擔講事實,話因航飛機餐唔掂,因航唔會搵你落廣告,搵你去旅行。

記者係咪「KOL」化先成功唔係重點,從頭到尾都唔係重點。重點係寫文個個人有無用心,有無寫一啲真係有「信用」,寫出來嘅野真係有人信,真係影響到人嘅野出來,唔係求其左抄新聞稿,右寫幾句好好味。

石先生成日都係咁講,唔好想到 KOL 咁複雜,你當呢啲人係以前報紙嘅專欄作家,咁成件事會清晰好多。當媒體充斥住機械人嘅時候,你要突出自已就要做一啲機械人唔會做,或者做唔到嘅野,唔係你同機械人有咩分別?




【此文章刊載於石先生部落;標題:「記者 KOL 化」不是重點,重點係你唔好再做機械人;本篇文章為贊助內容;強制廣告:HisTrend.HK 給你不一樣的科技產品】