那段苦練的日子(五)


在右欄望到「那段苦練的日子」這個奇怪系列,石先生自己重看一次就像回顧了自己的工作生涯。上回「那段苦練的日子(四)」講到「網絡偷文」,今篇就按時序繼續寫落去,時間回到石先生初入職「癮科技 X Engadget 中文版」之時。

除了「東抄西偷」外,石先生其實都有努力工作,開始會出去跑記者會。不過當時係公關無視網站時代,一個係香港大眾無咩知名度嘅網站要去記者會真係好難。

第一個記者會到底點知,石先生依家都唔記得,但好記得頭幾個記者有一個係 Apple 記者會,當時仲係 Apple 香港有公關嘅年代,石先生知道後就去左中環酒店外等。


由於石先生無預約,係收到風不請自來,所以係酒店樓下等嘅時候都有擔心過上唔到去。好彩係樓下等嘅時候剛好見到幾位之前見過嘅行家,所以係 Apple 公關落樓搵記者時,行家就叫埋我一齊。

同當時負責嘅公關交換卡片,對方好明顯唔識 「癮科技 X Engadget 中文版」,問多兩句後其實都有啲想拒絕石先生,但好彩當時身邊嘅行家出手,加入一句「佢地真係記者,出名嫁」就咁說服左 Apple 公關,可以跟上去採訪。

雖然石先生已經唔記得講呢句嘅行家朋友係邊位,但真係好多謝你,因為無你真係入唔到去,之後也都唔識點破解呢種問題。


解決左 Apple,其實後面仲有唔同難關要過,因為一間 Apple 識你唔代表其他公司識你,你要知道幾時有發佈會係一件毫不容易嘅事,好彩當時有幾位行家朋友帶特別好人,去親邊都叫埋石先生,而每次去到一個記者會就同公關打一次招呼,慢慢介紹公司,久而久之就咁令各科技公司都識「癮科技 X Engadget 中文版」,也都識得石先生,打通左記者採訪呢條路。

由於無人識、無人帶,咩都靠自己嘅關係,石先生記得有幾次發佈會除左同公關打招呼外,仲好貿貿然咁同每一個在場嘅記者交換卡片,自我介紹,依家諗返都覺得神奇。

點解當日可以做得出呢件事呢?似乎當時真係無方法到一個點。(題外話:之後係呢行打滾咁耐都未見過有人咁做)


 


EVERSWEET 智能寵物飲水機 - 活水更健康
https://anlander.com/





【此文章刊載於石先生部落;標題:那段苦練的日子(五);本篇文章為贊助內容;強制廣告:HisTrend.HK 給你不一樣的科技產品】