「樂視 X HKBN 發佈會」話明有第二回合,今次主角度係 HKBN 老細楊主光身上。話哂今次計劃有哂賣點,楊主光作為一個唔係咁多靚貨賣嘅老細今次企係台上被訪問都顯示佢功力深厚一面。

話説記者 B 問到,HKBN 依家都有寛頻電視,都有盒仔喎,今次同樂視合作係咪自已打自已,未來會唔會有衝突。單刀直入問到底,楊主光完全未驚過,仲要開宗明義答你真話,簡直係罕見老細。

楊主光話佢其實好耐無搞個電視,依家電視到底幾多錢都唔知,所以完全無得比較,而台下撐場嘅 HKBN 同事聽到都忍唔住笑。更正嘅係,記者 B 追問咁未來 HKBN 嘅寛頻電視點,楊主光直接玩大啲,話樂視盒子快啲去佢到,佢就直接執埋個寛頻電視唔再玩,豪爽程度真係估你唔到,而台下 HKBN 同事更直頭係歡呼連連。


 

回番少少帶,楊主光明顯都唔係普通貨色,介紹講到今次個 Plan 會提供 100M 寛頻時,直接話自已無個啲咩 6M、8M 咁慢,最基本都 100M,明串對手速度慢,而台下 HKBN 同事也都掌聲連連彎身笑。

不過,劍術好都要睇內功深厚與否,當記者 C 講到自已屋企無 HKBN 覆蓋,日日承受緊 8M 苦難,求救楊主光嘅時候,楊老細都無能為力,只有搬出一句「搬屋」,真係無可奈何。

 

講完楊主光,又講番「樂視 X HKBN 發佈會」本身。今次問答環節好高質,問題到肉得來,老細也都答得老實。正所謂影帝好無戲都要睇對手,今次記者就真係遇到好對手,更重要係記者唔做定功課分分鐘被玩番轉頭。


話説記者 D 問樂視老細早輪又話同 PCCW 合作,今日又同 HKBN 合作係咪玩起飛腳,左擁右抱。樂視老細就即時話自已無同 PCCW 合作,寛頻只係同 HKBN 合作,撇清關係。

做足功課嘅記者 D 當然知道自已錯係邊,即時補充自已講嘅係 now,唔係 PCCW,令樂視老細答番真正答案話自已同 now 只係簽左內容播放,但只有同 HKBN 先係合作寛頻,完全無左擁右抱。

好彩日前記者會並非正值暑假,否則部份報紙雜誌派出實習生分分鐘招架唔來,戰死沙場。





【此文章刊載於石先生部落;標題:唔做定功課會戰死沙場的「發佈會答問」;本篇文章為贊助內容;強制廣告:HisTrend.HK 給你不一樣的科技產品】


Stone IP 目前是自由撰稿工作者 + 社群網站經營,曾經於 Engadget 中文版工作八年之久,職至高級編輯。文章撰寫以貼近生活為主,內容以科技網絡與旅遊紀錄較多。此博客瀏覽量已超越達到 1,300 萬。